Venesuelada həyata keçirilən əməliyyat və prezident Nikolas Maduronun oğurlanması dünya ictimaiyyətində geniş rezonans doğurduğu bir vaxtda, Şimali Koreya rejimindən yeni addım gəlib.
Turkustan.az xəbər verir ki, Şimali Koreya ordusunun “böyük atəş gücü zərbə qrupu”na daxil olan bir bölmə ölkənin müharibədən çəkindirmə qabiliyyətini və silah sistemlərinin hazırlıq səviyyəsini yoxlamaq məqsədilə raket buraxılışı təlimi keçirib. Məlumata görə, Pxenyanın Ryokpho prefekturasından şimal-şərq istiqamətində buraxılan raketlər Şərq dənizində (Yaponiya dənizi) yerləşən hədəflərə çatmazdan əvvəl təxminən min kilometr məsafə qət edib.
Bildirilir ki, təlim çərçivəsində hipersəs silah sistemlərinin əməliyyat imkanları sınaqdan keçirilib. Şimali Koreya lideri Kim Çen In raket sınağının uğurla başa çatmasından məmnunluğunu ifadə edərək bildirib ki, bu təlim vasitəsilə milli müdafiə üçün vacib olan texnoloji tapşırığın yerinə yetirildiyi təsdiqlənib.
Son dövrlərdə ölkənin nüvə qüvvələrinin real müharibə şəraitinə hazırlanmasında mühüm irəliləyişlərin əldə edildiyini qeyd edən Kim Çen In vurğulayıb ki, hərbi texnologiyaların, xüsusilə hücum silahlarının daim təkmilləşdirilməsi özünümüdafiə üçün zəruri şərtdir. O əlavə edib ki, düşmən tərəflərin Şimali Koreyanın strateji hücum imkanlarının davamlı səfərbərliyi və yüksək dağıdıcı gücü barədə daim məlumatlandırılması müharibənin qarşısının alınmasında vacib və effektiv üsuldur.
Aytən Yaşar/ Turkustan.az
