“Dəmir Yumruq” Vətən Müharibəsi Veteranlarına
Dəstək İctimai Birliyinin
Azərbaycan ictimaiyyətinə və valideynlərə müraciəti
Hörmətli valideynlər və əziz şagirdlər,
Bizlər – canı və qanı bahasına Tarixi Zəfərimizin qazanılmasında əməyi olan Müzəffər Ordunun əsgərləri, Vətən Müharibəsi iştirakçıları, qazilər və veteranlar olaraq, son günlər vahid məktəbli geyimlərinin tətbiqinə qarşı yönələn bəzi əsassız etirazları dərin narahatlıq və təəssüf hissi ilə izləyirik.
Biz torpaqlarımızın azadlığı uğrunda döyüşəndə çiyin-çiyinə dayandığımız silahdaşlarımızla əynimizdə VAHİD HƏRBİ FORMA VAR İDİ. O FORMA BİZİ BƏRABƏRLƏŞDİRDİ, BİZİ BİR YUMRUQ ETDİ VƏ BİZƏ QƏLƏBƏ QAZANDIRDI. BU GÜN MƏKTƏBLƏRDƏ TƏTBİQ EDİLƏN VAHİD GEYİM DƏ MƏHZ HƏMİN FƏLSƏFƏNİN – BƏRABƏRLİYİN VƏ NİZAM-İNTİZAMIN RƏMZİDİR.
Bəzi şəxslərin bu geyimləri dini dəyərlərə zidd kimi qələmə vermək cəhdləri tamamilə yanlışdır. Vahid məktəbli geyiminin tətbiqi İslam dininin əleyhinə deyil, əksinə, onun uca dəyərləri ilə tam bir ahəng təşkil edir.
Vahid məktəbli geyimlərinin tətbiqinə etiraz edənləri bu addımlarından çəkinməyə çağırır və aşağıdakı xüsusları diqqətə çatdırırıq:
Nizam-intizama və elmi rəhbərliyə hörmət: İslam nizam və intizam dinidir. Dövlətin elm ocaqları üçün təyin etdiyi qaydalara riayət etmək, cəmiyyətdə xaosun qarşısını almaq hər bir vətəndaşın borcudur. Şagirdlərin fikrini "nə geyinim?" qayğısından azad edərək tamamilə elmə yönəltmək dinimizin elm öyrənmək çağırışına tam uyğundur.
Maddi bərabərsizliyin aradan qaldırılması: Məktəb fərqli sosial təbəqələrdən olan uşaqların bir araya gəldiyi müqəddəs bir məkandır. Vahid geyim imkanlı və imkansız ailələrin övladları arasındakı fərqi vizual olaraq silir, uşaqların psixologiyasını sinfi ayrı-seçkilikdən qoruyur.
Qayda-qanun və dövlətçilik tərbiyəsi: Forma geyinmək gənc nəslə erkən yaşlarından qanuna, nizama hörmət etməyi və rəsmiyyəti öyrədir. Dövlətin məktəb üçün təyin etdiyi formaya qarşı çıxmaq, intizamsızlığa zəmin yaratmaqdır.
Diqqətin təhsilə yönəldilməsi: Məktəb dəb nümayişi yeri deyil, elm ocağıdır. Vahid geyim şagirdlərin fikrini hər gün geyim qayğısından azad edərək tamamilə dərslərinə fokuslanmağa kömək edir.
Biz Vətən uğrunda can qoyan döyüşçülər kimi gələcəyimiz olan uşaqların intizamlı, bərabərhüquqlu və sağlam mühitdə böyüməsini arzulayırıq. Vahid geyim islahatını dəstəkləmək hər bir vətəndaşın və valideynin mənəvi borcudur.
Gəlin şəxsi ambisiyaları və bəhanələri bir kənara qoyub, Qələbəmizin memarı cənab Ali Baş Komandanın ətrafında sıx birləşərək övladlarımıza bərabərliyi və intizamı məhz məktəb illərindən peşəkar şəkildə aşılayaq!
Hər birinizə dərin hörmətlə,
“Dəmir Yumruq” Vətən Müharibəsi Veteranlarına Dəstək İctimai Biriliyi
Təqdim etdi: İctimai Birliyin Mətbuat Xidmətinin rəhbəri,
professor Elçin İsgəndərzadə (əlaqə telefonu: 050 562 7000)
