Azərbaycan Prezidenti İlham Əliyev Azərbaycanla Türkmənistan arasında müdafiə və energetika sahələrində əməkdaşlığı nəzərdə tutan iki sənədi təsdiqləyib.
Turkustan.az xəbər verir ki, dövlət başçısı bununla bağlı müvafiq fərmanlar imzalayıb.
Fərmanlardan biri 2026-cı il iyunun 22-də Bakı şəhərində imzalanmış “Azərbaycan Respublikası Hökuməti ilə Türkmənistan Hökuməti arasında müdafiə sahəsində əməkdaşlıq haqqında Anlaşma Memorandumu”nun təsdiq edilməsi ilə bağlıdır.
Sənədə əsasən, Memorandum qüvvəyə mindikdən sonra onun müddəalarının həyata keçirilməsini Azərbaycan Respublikasının Müdafiə Nazirliyi təmin edəcək.
Azərbaycan Respublikasının Xarici İşlər Nazirliyinə isə Memorandumun qüvvəyə minməsi üçün zəruri olan dövlətdaxili prosedurların yerinə yetirildiyi barədə Türkmənistan Hökumətinə bildiriş göndərilməsi tapşırılıb.
Digər fərmanla isə 2026-cı il iyunun 22-də Bakıda imzalanmış “Azərbaycan Respublikası Hökuməti ilə Türkmənistan Hökuməti arasında energetika sahəsində əməkdaşlıq haqqında Saziş” təsdiqlənib.
Saziş qüvvəyə mindikdən sonra onun müddəalarının həyata keçirilməsini Azərbaycan Respublikasının Energetika Nazirliyi təmin edəcək.
Xarici İşlər Nazirliyinə bu sənədin də qüvvəyə minməsi üçün zəruri dövlətdaxili prosedurların yerinə yetirildiyi barədə Türkmənistan Hökumətinə bildiriş göndərilməsi tapşırılıb.
Beləliklə, Azərbaycan və Türkmənistan arasında müdafiə və energetika sahələrində əməkdaşlığın hüquqi bazasını gücləndirən iki mühüm sənəd rəsmən təsdiqlənib.
