Mayın 2-3-də Bakıda “2024-cü il Türkdilli Dövlətlərin İqtisadi Forumu”nda qoyulan əsas məsələ türkdilli ölkələrin brendlərini dünyada tanıtmaq idi. Bu barədə Azərbaycan Françayzinq Assosiasiyasının İdarə Heyətinin sədri Camid Mövsümov media qurumlarına məlumat vermişdi (françayzinq bir tərəfin (françayzer) ödəniş əsasında digər tərəfə (françayzi) öz biznesinin idarə edilməsi hüququnun verilməsidir, bir növ icarə markanın icarəsi).
Daha sonra mayın 17-də Qazaxıstanda Azərbaycanın təşəbbüsü ilə türk dünyası markalarını birləşdirən “Made in Turan” brendi yaradıldi. “Made in Turan” markası Türk Dövlətləri Təşkilatına üzv olan ölkələrin istehsal etdiyi məhsulların vahid markalaşmaya keçid etməsi deməkdir.
C. Mövsümov qeyd etmişdir ki, bu brendin yaradılmasında məqsəd türkdilli ölkələr arasında mövcud investisiya imkanlarının öyrənilməsi, brendlərin beynəlxalq mühitə inteqrasiyasının təşkili, şirkətlər arasında kommersiya əlaqələrinin daha da inkişaf etdirilməsi və türkdilli ölkələr arasında əlaqələrin möhkəmləndirilməsidir.
Türk Dövlətləri Təşkilatına üzv olan ölkələrin vahid markalaşmaya keçid etməsi bu ölkələrin istehsal etdikləri məhsul, göstərdikləri xidmətə qarşı marağı daha da artıracaq və nəticədə şirkətlər arasında kommersiya əlaqələrinin möhkəmləndirilməsinə, inkişaf etdirilməsinə gətirib çixaracaq. Bu brendin tətbiq olunması nəticəsində xüsusi güzəştlər əldə olunacaq və türk dövlətləri arasında ticarət dövriyyəsi xeyli artacaqdır.
Bildiyimiz kimi, Türk Dövlətləri Təşkilatına (TDT) üzv ölkələr arasında bir çox siyasi, iqtisadi və mədəni sahələrdə əməkdaşlıq getdikcə daha da inkişaf etməldədir. Türk dünyası ölkələrinin qədim İpək Yolunun üzərində yerləşməsi ticarət dövriyyəsinı artmasına və türk dövlətlərinin regionda iqtisadi gücə çevrilməsinə şərait yaratmışdir.
Uzun illər fəaliyyət göstərən Azərbaycanlıların və digər Türkdilli Xalqların Əməkdaşlıq Mərkəzi indiyə qədər gördüyü işlərdə türkdilli dövlətlər arasında inteqrasiyanın inkişaf etdirilməsinə, mədəni, tarixi, elmi, iqtisadi, hərbi və ticarət əlaqələrinin gücləndirilməsinə həmişə tərəfdar olmuş və təbliğ etmişdir. Düşünürəm ki şengen ölkələri arasında vahid pul məkanının olması kimi, türkdilli dövlətlər arasında da yaradılan bu vahid brend məsuliyyəti artıracaq, beynəlxaq rəqabət apara bilməsi üçün ölkələrdə istehsal olunan məhsulların keyfiyyətinin artırılmasına gətirib çıxaracaq. Biz bu təşəbbüsü Türk Dünyası Birliyinin möhkəmləndirilməsində müsbət bir addım kimi qiymətləndirir və dəstəkləyirik.
Turan dövlətlərinin adının hallandığı bu brend ölkələr arasında iqtisadi əlaqələrin gücləndirilməsimdə mühüm addımdir.
Azərbaycanlıların və digər Türkdilli Xalqların Əməkdaşlıq Mərkəzi İctimai Birliyinin sədri
İlham İsmayılov
