Rusiyanın bir sıra bölgələrində ayıların yaşayış məntəqələrinə və insanlara yaxın ərazilərə çıxması ciddi təhlükəyə çevrilib. Son günlər xüsusilə Sibir və Uzaq Şərqdə ayı hücumları və yırtıcıların yaşayış məntəqələrində görünməsi ilə bağlı çoxsaylı hallar qeydə alınıb.
Turkustan.az xəbər verir ki, Krasnoyarsk diyarında vəziyyət daha da gərginləşib.
Sentyabrın 2-də Yenisey rayonunun Podtyosovo qəsəbəsi yaxınlığında meşəyə göbələk toplamağa gedən iki qadının meyiti aşkarlanıb. Fövqəladə Hallar Nazirliyi onların meyitlərində ayı izlərinin olduğunu açıqlayıb və əhaliyə meşələrə getməmək barədə xəbərdarlıq edib.
Bölgədə ayıların şəhər və kəndlərə çıxması da artıb. Krasnoyarsk şəhərində yırtıcıların yaşayış məntəqələrində görünməsi ilə əlaqədar yüksək hazırlıq rejimi tətbiq olunub. Milli park ərazisində isə ayı təhlükəsi səbəbindən gecə saatlarında ziyarətə məhdudiyyət qoyulub.
Məsələ təkcə Krasnoyarskla məhdudlaşmır. Kamçatka və Rusiyanın digər Sibir və Uzaq Şərq bölgələrində də ayıların insanlara yaxınlaşması ilə bağlı xəbərdarlıqlar verilir. Bəzi ərazilərdə yaşayış məntəqələrinin yaxınlığında təhlükəli hesab edilən ayılar məhv edilir. Kuzbassdakı beş rayon ayıların insanlarla toqquşmasının artması səbəbindən yüksək hazırlıq vəziyyəti elan edib.
Mütəxəssislərin bir hissəsi vəziyyətin əsas səbəblərindən birinin meşələrdə təbii qida ehtiyatlarının azalması olduğunu bildirir. Bu il bəzi ərazilərdə giləmeyvə və sidr qozasının məhsuldarlığının aşağı olması ayıları qida axtarışı üçün insan məskənlərinə yaxınlaşmağa vadar edir. Qida tullantıları, açıq zibil qabları və bağlardakı meyvələr də yırtıcıları yaşayış məntəqələrinə cəlb edir.
Vəziyyətin yaxın günlərdə daha da pisləşməsi ehtimalı istisna edilmir. Çünki ayılar qış yuxusundan əvvəl intensiv şəkildə qidalanaraq enerji ehtiyatı toplamağa çalışırlar. Təbii qida çatışmazlığı davam edərsə, onların insan məskənlərinə və asan qida mənbələrinə daha çox üz tutması mümkündür.
Rusiya FHN-i və yerli hakimiyyət orqanları sakinlərə meşələrə getməməyi, ayı ilə qarşılaşdıqda ona yaxınlaşmamağı və heyvanı yemləməmək barədə xəbərdarlıq edir. FHN xüsusilə vurğulayır ki, ayı ilə qarşılaşma zamanı insanın özünü qoruması son dərəcə çətin ola bilər.
Beləliklə, Rusiyanın bəzi bölgələrində ayıların fəallaşması artıq ayrı-ayrı insidentlərdən daha geniş təhlükəsizlik probleminə çevrilir. Payızın davam etməsi və qışa hazırlıq dövrünün intensivləşməsi ilə risklərin daha da artıb-artmayacağı isə təbii qida ehtiyatlarından və heyvanların yaşayış məntəqələrinə çıxışlarının qarşısının nə dərəcədə alınacağından asılı olacaq. /Bakıvaxtı.az/
