Paşinyanın cibinə banan qoyması xəbərinə Türkiyə mətbuatının reaksiyası

Ermənistanın baş naziri Nikol Paşinyanın Antalyada keçirilən COP31 sammitində iştirakı Türkiyə mətbuatının diqqət mərkəzində olub. Lakin bu dəfə Türkiyə mediasının yayımlarında iqlim müzakirələrinə deyil, Paşinyanın gündəlik həyatına aid məqamlara daha çox yer ayrılıb.

Turkustan.az xəbər verir ki, Türkiyə nəşrləri baş nazirin türk çayından zövq aldığı, eləcə də otel otağında əşyalarını toplayarkən bananı pencəyinin cibinə qoyduğu videoları diqqətə çatdırıblar.

Türkiyənin “Sözcü” nəşri materialını “Paşinyanın Antalyadakı qəribə hərəkətləri” başlığı ilə dərc edib. Məqalədə qeyd olunub ki, baş nazirin paylaşdığı videolar arasında ən çox müzakirə olunan məqamlardan biri bananı pencəyinin cibinə qoyması olub.

“Yeni Akit” qəzeti isə “Paşinyandan Antalyada qəribə görüntülər: bananı pencəyinin cibində gizlətdi” başlıqlı material dərc edərək həmin videonu ətraflı təhlil edib.

Beləliklə, dünya liderləri Antalyada iqlim dəyişikliyi ilə mübarizə məsələlərini müzakirə etdiyi bir vaxtda Türkiyə mətbuatının bir sıra nəşrlərində Paşinyanın səfərinin ən çox diqqət çəkən detalları bir stəkan çay və pencəyinin cibinə qoyduğu banan olub./Bizim.Media