ABŞ prezidenti Donald Trampın həftəsonu Ukraynanın yeni prezidentə ehtiyacı olduğu barədə açıqlamaları ölkədə seçkilərin keçirilməsi və Vladimir Zelenskinin siyasi gələcəyi ilə bağlı müzakirələri yenidən gündəmə gətirib.
Turkustan.az xəbər verir ki, müharibə səbəbindən təxirə salınan seçkilər və Zelenskinin potensial rəqibləri Ukraynada siyasi gündəmin əsas mövzularından birinə çevrilib.
Zelenskinin beşillik prezidentlik səlahiyyət müddəti 2024-cü ildə başa çatmalı idi. Lakin Rusiyanın Ukraynaya qarşı müharibəsi və ölkədə tətbiq olunan hərbi vəziyyət səbəbindən seçkilər təxirə salınıb, onun prezidentlik səlahiyyətlərini icra etməsi davam edir.
Ukraynada bir çox vətəndaş siyasi dəyişikliklərin tərəfdarı olsa da, müharibə başa çatmadan seçkilərin keçirilməsinə qarşı çıxanlar da var. Zelenski Rusiya ilə 60 günlük atəşkəs əldə olunacağı təqdirdə seçkilərin keçirilməsinə hazır olduğunu bildirib.
Seçkilərin nə vaxt keçiriləcəyi hələlik qeyri-müəyyən olaraq qalır. Bununla belə, Zelenskiyə mümkün rəqib ola biləcək şəxslərin adları artıq müzakirə olunur. Hərbi, kəşfiyyat və siyasi sahələrdə fəaliyyət göstərən dörd tanınmış şəxs potensial namizədlər arasında göstərilir.
Onların sırasında Ukraynanın keçmiş Baş Qərargah rəisi, hazırda isə ölkənin Londondakı səfiri olan Valeri Zalujnı xüsusi diqqət çəkir. O, Zelenskinin əsas potensial rəqiblərindən biri hesab olunur. Sorğulara əsasən, ukraynalıların 64 faizi Zalujnıya etibar edir.
53 yaşlı Zalujnı 2022-ci ildə müharibə başlayarkən Ukrayna ordusunun müdafiə əməliyyatlarına rəhbərlik edib. O, 2024-cü ilin fevralında, Ukrayna ordusunun uğursuz əks-hücum əməliyyatından sonra deyil, hərbi strategiya və rəhbərliklə bağlı fikir ayrılıqlarının yaşandığı bir dövrdə Baş Qərargah rəisi vəzifəsindən azad edilib. Daha sonra Böyük Britaniyaya səfir təyin olunub.
Aytən Yaşar/Turkustan.az
