ABŞ və müttəfiqləri İran dronları ilə mübarizə aparmağı iqtisadi cəhətdən səmərəsiz hesab edirlər, çünki onlar geniş istifadə olunur və çox ucuzdur.
Turkustan.az xəbər verir ki, bu barədə “The New York Times” qəzeti məlumat yayıb.
“Dronu vurmaq, onu havaya qaldırmaqdan daha baha başa gəlir. Hər atış üçün xərc nisbəti ən yaxşı halda 1-ə qarşı 10-dur”, - deyə dron istehsalçısı “Hylio” şirkətinin baş direktoru və həmtəsisçisi Artur Erikson qəzetə bildirib.
Məqalədə qeyd olunur ki, “Şahed” ailəsinə məxsus tək bir kamikaze dronun qiyməti 20 000 dollardan 50 000 dollara qədər dəyişir. Halbuki PUA-ları ələ keçirmək üçün istifadə edilən “Patriot” sistemlərindən tək bir atışın qiyməti 3 milyon dolları keçir.
ABŞ-nin daha ucuz bir variantı da var: “Raytheon Coyote” sistemi. Hər bir raketin qiyməti 126 500 dollardır ki, bu da xeyli ucuzdur, lakin yenə də “Şahed”dən bir neçə dəfə bahadır.
NYT həmçinin, dronların istiqamətini dəyişməyə və ya sıradan çıxarmağa imkan verən çoxsaylı başqa sistemlərin mövcud olduğunu da qeyd edir. Bunlara naviqasiya sistemlərini idarə edən və radiotezlikləri bloklayan avadanlıqlar, eləcə də, dronları sıradan çıxarmaq və ya onların istiqamətlərini dəyişmək üçün mikrodalğa və ya lazerdən istifadə edən sistemlər daxildir. Bu cür əks tədbirlər daha ucuzdur, lakin onların effektivliyi qeyri-müəyyəndir. /yeniavaz.com/
