Fələstinlilər ABŞ prezidenti Donald Trampın təqdim etdiyi “Qəzza münaqişəsinə son qoymaq üçün hərtərəfli plan”ın iki ildir davam edən soyqırımı dayandıra biləcəyinə ümid etsələr də, onun həyata keçirilməsi ilə bağlı ciddi şübhələr bildirirlər.
Turkustan.az xəbər verir ki, sentyabrın 29-da Ağ Ev Trampın 20 bənddən ibarət sülh planını açıqlayıb. Plana əsasən, əgər hər iki tərəf razılaşarsa, müharibə dərhal dayandırılacaq, İsrail Qəzzadan mərhələli şəkildə çəkiləcək, HƏMAS-ın iştirakı olmadan yeni idarəetmə prosesi başlayacaq və bütün məhbuslar azad ediləcək.
Tramp bu planın İsrailin baş naziri Binyamin Netanyahu ilə birlikdə Ağ Evdə keçirdiyi mətbuat konfransında təqdim edib.
Lakin fələstinlilər bu planın uğursuz olacağından ehtiyatlanırlar. Onlar bildirirlər ki, Tel-Əviv planın həyata keçirilməsi üçün aşağıdakı beş şərti irəli sürür:
Bütün israilli məhbusların azad edilməsi
HƏMAS-ın silahları yerə qoyması
Qəzzanın tam tərksilah edilməsi
İsrailin Qəzzada təhlükəsizlik nəzarətini əlində saxlaması
HƏMAS-ı əvəz edəcək “təhlükəsiz” bir mülki administrasiyanın qurulması
Fələstin tərəfi bu tələbləri “təslim olmaq” kimi qiymətləndirir və planın bölgədə davamlı sülhə gətirib çıxaracağına inanmır.
Aytən Yaşar/ Turkustan.az
