Kalsium sümüklərin formalaşması və möhkəmlənməsi üçün ən vacib minerallardan biridir və böyüklərin gündəlik ehtiyacı təxminən 1000–1300 milliqramdır.
Turkustan.az "Eating Well” nəşrinə istinadən xəbər verir ki, bir stəkan inək südü bu ehtiyacın təxminən 23 faizini təmin edir, lakin digər içkilər də kalsium mənbəyi ola bilər.
Kalsiumla zəngin 4 içki
Zənginləşdirilmiş soya südü
Soya südü təbii olaraq kalsium mənbəyidir və bir çox istehsalçı onu əlavə kalsium və D vitamini ilə zənginləşdirir. Bəzi markalarda bir porsiyada 450 mq-a qədər kalsium və təxminən 8 qram zülal olur. Araşdırmalar göstərir ki, soya mənşəli zülallar qadınlarda sümük mineral sıxlığını süd məhsullarına bənzər şəkildə yaxşılaşdıra bilər.
Zənginləşdirilmiş badam südü
Dietoloqların məlumatına görə, bir stəkan badam südü gündəlik kalsium ehtiyacının təxminən üçdə birini təmin edə bilər. Lakin istifadə olunan kalsiumun forması markadan asılı olaraq dəyişir və orqanizm tərəfindən sorulma dərəcəsi inək südünə nisbətən fərqli ola bilər.
Kalsiumla zənginləşdirilmiş portağal şirəsi
Bir stəkan belə şirə gündəlik kalsium ehtiyacının təxminən 30 faizini təmin edə bilər. Üstəlik, tərkibində D vitamini də olur ki, bu da kalsiumun mənimsənilməsini artırır. Portağal şirəsində olan hesperidin adlı flavonoidlər sümük sağlamlığını dəstəkləyə, sümük itkisini azalda və sümük toxumasının bərpasına kömək edə bilər.
Kefir
Kefir fermentləşdirilmiş süd məhsuludur və təkcə kalsiumla deyil, həm də probiotiklərlə zəngindir. O, sümük mineral sıxlığını artırmağa, sümük toxumasının dağılmasını azaltmağa və sümük əmələ gəlməsini gücləndirməyə kömək edə bilər. Xüsusilə menopauzadan sonrakı qadınlarda daha nəzərəçarpan təsir göstərir.
Qeyd olunur ki, kefirdəki Lactobacillus kimi probiotiklər kalsiumun daha yaxşı sorulmasına və iltihabi proseslərin azalmasına dəstək ola bilər. /qaynarinfo.az/
