İndoneziyanın Anak Krakatau vulkanının püskürməsi nəticəsində yaranan kül buludu ölkənin qərb hissəsinə yayılıb.
Turkustan.az xəbər verir ki, bu səbəbdən Cakartadakı Soekarno-Hatta Beynəlxalq Hava Limanında uçuşlar dayandırılıb və qərardan təxminən 22 800 sərnişin zərər çəkib.
İndoneziya Geologiya Agentliyinin məlumatına görə, Sunda boğazında yerləşən vulkanik adada cümə günündən etibarən aktivlik müşahidə olunub. Bu gün saat 03:53-də isə vulkanda təxminən 30 saniyə davam edən püskürmə baş verib. Qapalı dövrəli kameraların görüntülərində kraterdən lava püskürməsi qeydə alınıb.
Püskürmə nəticəsində ölən və ya xəsarət alan olmayıb, həmçinin təxliyə qərarı verilməyib. Bununla belə, hakimiyyət orqanları sakinlərə və turistlərə aktiv kraterdən ən azı 3 kilometr məsafədə uzaq durmağı tövsiyə edib.
İndoneziya Vulkanologiya və Geoloji Fəlakətlərin Azaldılması Mərkəzi isə vulkanik külün Cakarta ilə yanaşı, Sumatranın cənubundakı Lampunq əyalətinin bəzi ərazilərinə yayıldığını açıqlayıb. Kül səbəbindən Cakartadakı əsas hava limanı ilə yanaşı, bir sıra digər hava limanlarında da uçuşlar məhdudlaşdırılıb.
Aytən Yaşar/ Turkustan.az
