İsrailin keçmiş baş naziri və əsas müxalifət partiyası olan “Gələcək Var”ın lideri Yair Lapid ABŞ ilə İran arasında əldə olunan razılaşmanı sərt tənqid edərək, baş nazir Benyamin Netanyahunu uğursuzluqda ittiham edib.
Turkustan.az xəbər verir ki, partiyasının həftəlik parlament qrupunun iclasından əvvəl Təl-Əvivdə jurnalistlərə açıqlama verən Lapid Vaşinqton və Tehran arasında əldə edilən anlaşmanın İsrail hökumətinin diplomatik məğlubiyyətini ortaya qoyduğunu bildirib.
“Netanyahu bu mübarizəni uduzub. İran məsələsində yaşananlar onun ən böyük diplomatik uğursuzluqlarından biridir. Artıq Netanyahunun bu prosesin öhdəsindən gələ bilmədiyini qəbul etməyin vaxtıdır”, – deyə Lapid vurğulayıb.
Müxalifət lideri həmçinin ABŞ Prezidenti Donald Trampın Netanyahuya münasibətinə diqqət çəkərək, Vaşinqtonun son qərarlarının İsrail hökumətinin prosesə təsir imkanlarının məhdud olduğunu göstərdiyini qeyd edib.
Lapidin sözlərinə görə, ABŞ ilə İran arasında əldə olunan razılaşma Netanyahu hökumətinin İran siyasətinin effektivliyi ilə bağlı ciddi suallar yaradıb.
Aytən Yaşar/ Turkustan.az
