ABŞ Maliyyə Nazirliyi Rusiyaya hərbi avadanlıq satan bəzi şirkətləri sanksiya siyahısından çıxarıb. Bura müdafiə sektorundakı şirkətlər də daxildir.
Turkustan.az xəbər verir ki, bu barədə məlumat ABŞ Maliyyə Nazirliyinin saytında yerləşdirilib.
Bildirilib ki, bu şirkətlər arasında "Kipr Veles International Limited" və onun sahibi Dmitri Buqayenko da var. Bu, Moskvada yerləşən investisiya şirkətinin törəmə müəssisəsidir. Lakin təşkilatın Moskvada yerləşən hüquqi şəxsləri sanksiyalar altında qalır.
Bundan əlavə, ABŞ Dubayda yerləşən "365 Days Freight Services FZCO" və Türkiyənin "Etasis" şirkətlərinə tətbiq edilən sanksiyaları ləğv edib. Bu şirkətlər Rusiyaya hərbi-sənaye kompleksində istifadə üçün sanksiya altında olan avadanlıqlar ixrac edirdilər.
Həmçinin Finlandiyanın "Hi-Tech Koneisto" şirkəti və onun baş meneceri, Finlandiya vətəndaşı Yevqeni Dremov üçün də məhdudiyyətlər aradan qaldırılıb. Onlar sanksiyalar altında olan Rusiya şirkətlərinə optoelektronika və laboratoriya avadanlıqları təchiz edirdilər.
Qeyd edək ki, ABŞ hazırda bu qərarın səbəblərini açıqlamır. Bundan əlavə, Vaşinqtonun bu vasitəçilərdən məhsulların son alıcıları olan Rusiya şirkətlərinə qarşı siyasətini dəyişib-dəyişdirməyəcəyi məlum deyil./publika.az
