Prezident Rəcəb Tayyib Ərdoğan Lütfi Kırdar Konqres Mərkəzində İslam Əməkdaşlıq Təşkilatının (İƏT) Xarici İşlər Nazirləri Şurasının 51-ci Sessiyasında çıxış edib.
Turkustan.az xəbər verir ki, İsrail və Netanyahuya reaksiya verən Ərdoğan sözlərini belə davam etdirib:
"Ədalət zəfər çalacaq və qələbə mütləq möminlərin olacaq. Sülhdən danışacağımız gözəl günlər görəcəyimizə ürəkdən inanıram. Arxasında Qərb güclərinin qeyd-şərtsiz gücü olan İsrail bölgəmizi qeyri-sabitliyə sürükləməyə davam edir. Netanyahu hökuməti regional sülhə ən böyük maneə olduğunu sübut etdi. İsrailin İrana hücumlarını ən sərt şəkildə qınayıram. İsrailin Qəzzaya, Livana, Yəmənə, Suriyaya və ən son İrana hücumlarının tərifi və təsviri banditizmdir. Təbii ki, hücumların İranın nüvə proqramı ilə bağlı danışıqların intensivləşdiyi bir dövrdə baş verməsi əlamətdardır. İran xalqının çətinliklər qarşısında göstərdiyi həmrəylik və güclü dövlət təcrübəsi ilə bu günlərin öhdəsindən gələcəyinə heç bir şübhəmiz yoxdur. İranın İsrailin bu dövlət terrorundan öz xalqını müdafiə etmək üçün gördüyü tədbirlər tamamilə təbii və qanunidir.
İsrail paytaxtı Şərqi Qüds olan müstəqil Fələstin Dövləti ilə dinc yanaşı yaşamaq əvəzinə, müharibəni bütün bölgəyə yaymağa çalışır.
Hitlerin 90 il əvvəl yandırdığı qığılcım dünyanı yandırdığı kimi, Netanyahunun sionist ambisiyalarının da dünyanı fəlakətə sürükləməkdən başqa məqsədi yoxdur. Burada vurğulamaq istərdim ki, Türkiyə olaraq bölgəmizdə sərhədləri qanla çəkiləcək yeni bir Sayks-Pikot nizamının qurulmasına icazə verməyəcəyik.
Netanyahunun münaqişələri dərinləşdirmək məqsədi daşıyan zəhərli sözlərinə heç kim inanmamalıdır. Bölgəmiz yeni müharibəyə tab gətirə bilməz. Bizə lazım olan şey sağlam düşüncədir.
Yollar da, üsullar da fərqli ola bilər, amma qardaş olmaq həm də tale yoldaşı olmaq deməkdir. Müsəlmanların ortaq taleyi var. Fərqlərimizi bir kənara qoyub birləşmək bizim borcumuzdur. Bu gün biz bir-birimizi daha sıx qucaqlayıb, bir-birimizə qarşı tolerantlıq sərhədlərini genişləndirməliyik. Biz bu görüşdə İsrailə qarşı mövqeyimizi dünyaya bəyan etməliyik. İsrailin quldurluğunu dayandırmaq üçün daha çox əməkdaşlıq göstərməyimiz vacibdir. Əgər öz ağlımızla öz məsələlərimizə sahib çıxmasaq, başqalarının mənafeyinə alət olacağıq".
Aytən Yaşar/ Turkustan.az
