Müstəntiqlər iyunun 1-də Rusiya bölgələrinə hücum edən pilotsuz təyyarələri daşıyan yük maşınlarının sürücülərini dindiriblər.
Rusiya mətbuatı xəbər verir ki, həmin şəxslər silah daşıdıqlarından xəbərsiz olduqlarını etiraf ediblər. Onlara dronların əvəzinə karkas evləri daşımalı olduqlarını bildiriblər.
Bundan əlavə, başqa bir ümumi əlamət var: bütün sürücülər müəyyən 37 yaşlı Artyoma məxsus avtomobilləri idarə ediblər.
Bütün maşınlar Çelyabinskdə yüklənib. Dronların Murmansk vilayətindəki hərbi aerodroma hücum etdiyi yük maşınının sürücüsü, Çelyabinsk şəhərinin 55 yaşlı sakini Aleksandr Z. deyib ki, o, yerli sahibkardan sifariş alıb: öz şəhərindən Murmansk vilayətinə karkas evləri daşımaq lazımdır. Qiyməti müzakirə etdikdən sonra “mallar” maşına yüklənib, sonra isə yol boyu həmin şəxslə bir neçə dəfə telefonla əlaqə saxlayıb, harada dayanacağı barədə məlumat verilib. Son vəzifə aerodromun yaxınlığında yerləşən yanacaqdoldurma məntəqəsində dayanma idi.
Oxşar əhvalatı Ryazan və İvanovo vilayətlərinə hücum edən dronları daşıyan yük maşınlarının sürücüləri də danışıblar. 46 yaşlı Sergey də Çelyabinskdən sifarişi yerinə yetirirdi və Ryazana gedərkən qəflətən onun yük maşınından pilotsuz təyyarələr uçmağa başlayıb. Eyni şey İvanovo aerodromunun yaxınlığında dayanan sürücü ilə də baş verib.
Hazırda hüquq-mühafizə orqanlarının əməkdaşları həmin avtomobillərin sahibi Artyomu axtarırlar. İlkin məlumata görə, o, Ukrayna vətəndaşıdır.
O da məlumdur ki, başqa bir yük maşını təyinat yerinə çatmayıb və hazırda yolun bir hissəsinin bağlı olduğu Çita-Xabarovsk avtomobil yolunda hərəkətdə olarkən partlayıb. Sürücünün sağ qalmadığı iddia edilib. Polis əməkdaşları Amur vilayətində araşdırmaları davam etdirirlər./publika.az
