Gündəlik həyatda yol nəqliyyat hadisələrinə tez-tez rast gəlinir. Adətən sürücüyə dəymiş ziyanı sığorta şirkətləri həll etsə də, bəzən hansısa sürücünün sığortasız avtomobil idarə etdiyinin şahidi oluruq.
Bəs sığortası olmayan sürücünün digər nəqliyyat vasitəsinə vurduğu zərərin xərcini kim ödəyəcək?
Mövzu ilə bağlı Pravda.az-a açıqlama verən nəqliyyat eksperti Eldəniz Cəfərov qeyd edib ki, bu halda sığortasız idarə etdiyi üçün sürücü cərimə ödəməlidir.
Onun sözlərinə görə, zərər vermiş tərəfin sığortası yoxdursa, zərərçəkənin avtomobilinin təmirini zərərçəkənin sığorta şirkəti həyata keçirir: “Daha sonra isə həmin sığorta şirkəti zərər verəndən həmin zərərin geri alınması ilə bağlı iddia qaldırır və həmin zərəri geri alır. Eyni zamanda, zərər vermiş şəxs sığortasız maşın idarə etdiyi üçün 50 manat məbləğində cərimə olunur. Bildirim ki, Azərbaycan Respublikasında mühərrik həcmi 50 sm³-dən başlayaraq bütün nəqliyyat vasitələri icbari sığorta olunmalıdır”.
