Uzun illərdir yaşanan gərginlik fonunda Rusiya iddia edir ki, Avropa ona qarşı hücuma hazırlaşır.
Rusiyanın xarici işlər nazirinin müavini Aleksandr Qruşko Avropa ölkələri Birləşmiş Ekspedisiya Qüvvələrinin (OES) keçirdiyi təlimlər çərçivəsində Kalininqrad vilayətinin dəniz blokadası və ələ keçirilməsi ssenarilərini məşq etdiklərini bildirib.
Onun sözlərinə görə, OES himayəsi altında keçirilən təlimlərdə belə ssenarilər də nəzərdən keçirilir.
Qruşko qeyd edib ki, son illərdə Uzaq Şimal, Şimali Atlantika və Baltik dənizi zonasında operativ reaksiya üçün məsul olan Avropa hərbi qüvvələrinin fəallığı artmaqdadır.
O, həmçinin NATO-nun “Baltik keşikçisi” əməliyyatını xatırladıb.
Bu əməliyyat Baltik dənizinin dibində enerji və kommunikasiya kabellərinin zədələnməsindən sonra başladılıb.
Bu əsasda da XİN rəsmisi hesab edir ki, Avropa ölkələri Birləşmiş Ekspedisiya Qüvvələrinin (OES) keçirdiyi təlimlər çərçivəsində Kalininqrad vilayətinin dəniz blokadası və ələ keçirilməsi ssenarilərini məşq edir.
Aleksandr Qruşko bəyan edib ki, ölkəsi mümkün ciddi münaqişə halında prioritet hədəflər siyahısını yenidən nəzərdən keçirərkən Fransanın nüvə silahını Avropanın nüvəsiz ölkələrinin ərazisində yerləşdirmək niyyətini nəzərə alacaq.
Xatırladaq ki, mart ayında Fransa nüvə qüvvələrinin Avropanın nüvə silahına malik olmayan ölkələrdə yerləşdirilməsi ehtimalını istisna etməyib. Bu xüsusda əsasən də Polşa nəzərdə tutulur. Fransa Prezidenti Makron həmçinin Parisin malik olduğu nüvə silahlarının sayının artırılması barədə göstəriş verib.
II Dünya müharibəsi də belə başlamışdı...
Rusiya Prezidenti Vladimir Putinin mətbuat katibi Dmitri Peskov isə Almaniyaya xəbərdarlıq edib. O bildirib ki, Almaniyada hərbi sənaye və ordunun gücləndirilməsi fonunda hər şey II Dünya müharibəsindən əvvəlki durumu xatırladır.
Xatırladaq ki, II Dünya Müharibəsindən əvvəl də Almaniya sürətlə silahlanma mərhələsinə qədəm qoymuşdu. İndi də Almaniyanın avtomobil nəhəngləri profillərini dəyişərək, maşınların əvəzində silah istehsalına üstünlük verməyə başlayıb.
Avropa ilə Rusiya arasında savaş başlayacaq?
Mövzu ilə bağlı Bizim.Media-ya açıqlamasında politoloq Qabil Hüseynli bildirib ki, Avropa ilə Rusiya arasında savaş ehtimalı indiki halda mümkünsüzdür:
“Rusiyanın Ukraynaya təcavüzü bu ana qədər hərbi məsələlərə ciddi önəm verməyən Avropa ölkələrini də istər-istəməz oyatdı. Avropa artıq dərk edir ki, Rusiyanın qarşısı alınmasa o, Ukraynadan sonra şirniklənərək, qitənin daha dərinliklərinə doğru irəliləmək niyyətinə düşəcək.
Onun nəticəsidir ki, Avropa ABŞ-dan fərqli olaraq Ukrayna məsələsinə daha çox həssas yanaşır. Eyni zamanda, paralel olaraq qitə ölkələri özlərinin hərbi gücünü də artırır. Bu əsasda da görürük ki, əsasən Böyük Britaniya, Fransa və Almaniya hərbi cəhətdən möhkəmlənməyə çalışırlar”.
Politoloq deyir ki, Moskvanı xüsusən də Almaniyanın silahlanma yönündəki hərəkətləri qıcıqlandırır:
“Çünki Rusiyaya hələ də belə düşünür ki, Almaniya silahlana bilməz”.
Həmsöhbətimizin fikrincə, Avropa ölkələri Birləşmiş Ekspedisiya Qüvvələrinin təlimlərinə isə adi təlimlər kimi baxmaq lazımdır:
“Hər bir dövlət gərgin münasibətlərin mövcud olduğu dövrdə sabitlik dövrü ilə müqayisədə daha çox dərəcədə öz təhlükəsizliklərinin qayğısına qalır. Birləşmiş Ekspedisiya Qüvvələrinin təliminə də bu kontekstdə yanaşmaq lazımdır”.
Ekspertin sözlərinə görə, Moskvanın belə məqamları qabartması isə əslində özünün gələcək ekspansiyasına don geyindirmək, qarşı tərəfi cavab tədbirlərinə əl atmaqla hədələmək məqsədi daşıyır:
“Bütün hallarda Avropa ilə Rusiya arasında savaşın olacağı ehtimalı çox aşağıdır. Moskva xeyli zəifləyib. Rusiya heç Ukraynanın öhdəsindən gələ bilmir. Bu əsasda onun başqa bir Avropa ölkəsinə hücumu Rusiyanı birmənalı şəkildə daha ağır duruma salacaq. Rusiya yalnız Ukrayna müharibəsindən uduşlu çıxacağı təqdirdə, Avropanı da cəzalandırmaq barədə düşünə bilər. İndiki halda isə bunlar boş söhbətlərdir”.
