Ermənistan özünə dost saydığı İranı da satmağa başlayıb.
Məlumatlara görə, Ermənistan hakimiyyəti ABŞ xüsusi xidmət orqanlarına İrana yönələn tranzit avia daşımalarla bağlı məxfi məlumatlar ötürüb. Bundan əlavə, Ermənistanın cənub bölgəsində ABŞ və İsrailin maraqları naminə casusluq fəaliyyəti həyata keçirilib.
Bu əməliyyatlara Ermənistandakı Avropa İttifaqı missiyasının cəlb olunduğu da iddia olunur.
Yayılan məlumatlara görə, Milli Təhlükəsizlik Xidmətinin rəhbəri Armen Abazyan da məhz bu əməliyyatlarda iştirakdan imtina etdiyinə görə, vəzifədən uzaqlaşdırılıb.
Görünən odur ki, Ermənistan ilk fürsət düşən kimi Tehranı satmaq yolunu tutub.
Belə vəziyyətdə İran Ermənistan münasibətlərində nə dəyişəcək?
Mövzu ilə bağlı Bizim.Media-ya açıqlamasında Milli Məclisin deputatı Hikmət Babaoğlu bildirib ki, Ermənistan İran münasibətləri İrəvan tərəfindən islamofob siyasi təfəkkür əsasında formalaşıb:
“Ermənistan Təhlükəsizlik Xidmətinin İranla bağlı məlumatları İsrail və ABŞ-a ötürməsi əslində erməni mentalitetinin çox bariz nümunələrindən biridir. Baxmayaraq ki, İran daima Ermənistanı özünə müttəfiq hesab edib. Buna rəğmən Ermənistan İrana həmişə bir müsəlman ölkəsi kimi baxıb və situativ olaraq öz maraqlarını təmin etmək üçün ona dost kimi görünüb”.
Həmsöhbətimiz deyir ki, İranın yaxın qonşusu və dostu kimi Ermənistanın bu cür oyunlarını həmişə onlara demişik:
“Orada yaşayan azərbaycanlıların, İran vətəndaşlarının mənafeyindən çıxış edən bir ölkə kimi daima Azərbaycan Ermənistanın bu xislətilə bağlı məsələləri Tehranın diqqətinə çatdırıb. Amma təəssüf ki, Tehranın bu kontekstdə mövqeyi adekvat olmayıb. Ermənilərin belə hərəkət edəcəyi tamamilə gözlənilən idi”.
Amma ekspertin fikrincə, bu hələ məsələnin hamısı deyil:
“Bir müddətdən sonra, müharibənin gedişində Avropa İttifaqının Ermənistandakı monitorinq missiyasının da təkcə Azərbaycanla bağlı məlumatları toplayıb İrəvana verməsi deyil, həmçinin İranla bağlı məlumatları ABŞ və İsrailə ötürmələri də yəqin ki, aydın olacaq. Bu ehtimal böyükdür.
Əminəm ki, proseslərin müəyyən mərhələsində bu da ortaya çıxacaq. Çünki “binokl” adlandırdığımız bu müşahidə cihazı sadəcə binokl deyil. Avropalılar o qədər sadəlövh deyillər ki, Ermənistan Azərbaycan və Ermənistan İran sərhədini binoklla müşahidə etsinlər. Bunlar ən müasir kiber təchizatla təmin olunmuş xüsusi nəzarət aparatlarıdır ki, ən müxtəlif koordinatları peyk vasitəsilə istənilən mənbəyə ötürə bilirlər”.
H. Babaoğlu qeyd edir ki, heç olmasa indi İran dostunun, düşməninin kim olduğunu dərk etməlidir:
“Müharibədən daha ekstremal vəziyyət yoxdur. Müharibə vaxtı müttəfiq hesab etdiyi Ermənistan İranı satırsa, Tehran nəhayət özünün xarici və Cənubi Qafqaz siyasətində həqiqi müttəfiqinin kim olduğu barədə tərəf müəyyənləşdirməlidir”.
