Türkiyə hava məkanına İraq və Suriya üzərindən daxil olan İran raketləri NATO-nun müdafiə sistemləri tərəfindən məhv edilib.
Turkustan.az xəbər verir ki, Türkiyə eyni bölgədən atılan və sonradan havada qarşısı alınan bir sıra raket hücumlarından sonra İran hökumətinə yüksək səviyyəli xəbərdarlıq edib. Prezident Rəcəb Tayyib Ərdoğan, İran Prezidenti Məsud Pezeşkianın xahişi ilə baş tutan telefon danışığında Türkiyənin tərəf olmadığı münaqişələrdən mənfi təsirləndiyini bildirib. Ərdoğan vurğulayıb ki, əsaslandırılmasından asılı olmayaraq, Türkiyə hava məkanının pozulması qəbuledilməzdir və Türkiyə bütün zəruri tədbirləri görməyə davam edəcək.
Xarici işlər naziri Hakan Fidan isə iranlı həmkarı Abbas Arakçi ilə görüşündə risk yarada biləcək addımlardan çəkinməyin vacibliyini qeyd edib. Digər tərəfdən, Arakçi Türkiyə hava məkanına yönəlmiş raketlərin İran tərəfindən atılmadığını iddia edib.
“Türkiye” qəzetindəki xəbərə görə, təhlükəsizlik mənbələri ikinci raketin birinci ilə eyni mənzilə malik olduğunu, hər iki raketin eyni nöqtədən atıldığını və buraxılış yerinin Tehranın şərqində olduğunu bildirib.
Mənbələr vəziyyətin İranın "Mozaika Müdafiə" sistemindən qaynaqlandığını bildiriblər. ABŞ və İsrailin hücumların ilk günlərində İranın mərkəzi müdafiə sistemini sıradan çıxardığı və bununla da əvvəllər verilən müdafiə qərarlarının avtomatik olaraq tətbiq olunmasına imkan verdiyi güman edilir.
Aytən Yaşar/ Turkustan.az
