Rusiyanın Ukraynaya qarşı yay aylarında həyata keçirdiyi hücum kampaniyası uğursuzluqla nəticələnib. Rusiya Silahlı Qüvvələrinin canlı qüvvə itkisi 100 min nəfərə qədər çatsa da, əldə olunan ərazi qazancları olduqca məhdud olub.
Bu barədə "The Economist" jurnalı məlumat yayıb.
Məqalədə qeyd edilir ki, Qərb mətbuatında və ekspert dairələrində əsas diqqət Ukrayna ordusunun şəxsi heyət çatışmazlığına və Rusiyanın davamlı hücumlarına yönəlib. Lakin jurnalın fikrincə, bu, məsələyə birtərəfli yanaşmadır.
“Daha çox təsir bağışlayan odur ki, Rusiya üçüncü və indiyədək ən böyük hücumu zamanı necə az ərazi ələ keçirdi və bunun üçün insan və texnika baxımından necə dəhşətli bədəllər ödəməli oldu. Əgər vəziyyət köklü şəkildə dəyişməzsə, Vladimir Putin döyüş meydanında bu müharibəni qazana bilməyəcək. Onun bütün bunlara baxmayaraq hücumları davam etdirməsi, ideyalarının tükəndiyini göstərir”, – deyə "The Economist" yazır.
Jurnalın təhlilinə görə, Qərb hökumətləri və müstəqil tədqiqatçılar tərəfindən toplanmış təxminən 200 etibarlı mənbə əsasında Rusiyanın itkiləri analiz olunub. Bu məlumatlar göstərir ki, genişmiqyaslı müharibənin başlanğıcından 2025-ci ilin yanvarına qədər Rusiya ordusunun ümumi itkisi 640 min ilə 877 min nəfər arasında olub. Onlardan 137 mindən 228 minə qədəri həlak olub.
13 oktyabr 2025-ci il tarixinədək bu rəqəmlər təxminən 60% artaraq 984 min nəfərə çatıb, ümumi itki sayı isə 1,44 milyon nəfəri keçib. Bu rəqəmlərin 190–480 mini arasında ölənlər olduğu bildirilir.
Buna baxmayaraq, Rusiya 2025-ci il ərzində müəyyən ərazi uğurları əldə etsə də, bunlar ümumilikdə Ukraynanın miqyası baxımından əhəmiyyətsiz sayılır. "The Economist"in hesablamalarına görə, hazırkı templə Rusiya Luqansk, Donetsk, Xerson və Zaporojye vilayətlərini ən tezi 2030-cu ilin iyununda tam ələ keçirə bilər. Ukraynanın tam işğalı isə bu sürətlə 100 ildən çox zaman tələb edərdi. /AzPolitika.info/
