Hollandiyanın müvəqqəti xarici işlər naziri David Van Weel Türkiyənin Avropa təhlükəsizliyi baxımından mühüm rol oynadığını vurğulayıb.
Turkustan.az xəbər verir ki, o, bildirib: “Buna görə də NATO daxilində belə güclü bir millət görməkdən çox məmnunam. NATO-da işlədiyim dövrdə Türkiyənin təhlükəsizliyimizə verdiyi son töhfələri yaxından gördüm və düşünürəm ki, hamımız buna sevinməliyik”.
Van Weel Türkiyənin NATO-da təmsil olunmasından məmnunluğunu ifadə edərək bunun Avropa təhlükəsizliyi üçün böyük əhəmiyyət daşıdığını qeyd edib.
Nazir bu fikirləri Almaniyanın Münhen şəhərində keçirilən Münhen Təhlükəsizlik Konfransı çərçivəsində AA müxbirinə verdiyi açıqlamada səsləndirib.
ABŞ-ın Avropadan mümkün hərbi çıxarılması ilə bağlı müzakirələr fonunda o, Marko Rubionun konfransdakı çıxışını “çox təsəlliverici” adlandırıb.
Van Weel bildirib ki, Rubio Avropanın müdafiə sahəsində daha çox məsuliyyət və səy göstərməli olduğunu vurğulayıb. O əlavə edib ki, Avropa dünyanı yalnız öz baxış bucağı ilə deyil, mövcud reallıqlar çərçivəsində qəbul etməlidir.
Aytən Yaşar/ Turkustan.az
