Böyük Britaniyanın Baş naziri Keir Starmer ABŞ Prezidenti Donald Trampın tarif siyasəti və birtərəfli hərəkətləri ilə Qərb müttəfiqlərini uzaqlaşdırdığı bir vaxtda, Qərb alyansının geosiyasi rəqibi olan Çinə rəsmi səfər edəcək.
Turkustan.az xəbər verir ki, Çin Xarici İşlər Nazirliyinin sözçüsü Quo Ciakukun açıqlamasına görə, Starmer Çin Baş naziri Li Qianqın dəvəti ilə 28–31 yanvar tarixlərində Pekinə səfər edəcək. Beləliklə, Böyük Britaniya tərəfindən əvvəl elan edilən səfər Çinin rəsmi bəyanatı ilə təsdiqləndi.
Starmer səkkiz ildən sonra Çinə səfər edən ilk Britaniya baş naziri olacaq. Sonuncu səfər 2018-ci ildə keçmiş Baş nazir Tereza Mey tərəfindən həyata keçirilmişdi.
Baş nazir səfəri zamanı iki ölkə arasında gərginləşən iqtisadi münasibətləri normallaşdırmaq və gücləndirmək, həmçinin Trampın Avropanı Rusiya–Ukrayna müharibəsindən kənarlaşdırma siyasəti, Qrenlandiyanın ilhaqı və digər revizionist tələbləri fonunda Qərb ittifaqını yeni kontekstdə qiymətləndirmək niyyətindədir.
Uzun müddət ABŞ-ın Çinə qarşı siyasətini izləyən Britaniya indi Trampın siyasətinin formalaşdırdığı qlobal uyğunlaşmalarda öz xarici siyasət kursunu müəyyənləşdirməyə çalışır.
Aytən Yaşar/ Turkustan.az
