ABŞ və Ukrayna arasında aparılan danışıqlar kritik mərhələyə daxil olub. Axios-un məlumatına görə, bu gün keçirilən növbəti raundda Vaşinqton Kiyevdən ərazi məsələləri və təhlükəsizlik təminatları üzrə qəti mövqe ortaya qoymasını tələb etməyə hazırlaşır.
Turkustan.az xəbər verir ki, Cenevrədə ötən bazar günü keçirilən raund zamanı tərəflər bir çox məsələlərdə razılığa gəlsələr də, iki əsas mövzu üzrə fikir ayrılığı qalmaqda davam edib: ərazilərin gələcək statusu və Ukraynaya veriləcək təhlükəsizlik zəmanətləri.
Məlumata görə, bu iki məsələdə kompromis əldə olunmaması danışıqların nəticəsini qeyri-müəyyən saxlayır. Axios yazır ki, yüksək vəzifəli ABŞ rəsmisi Ağ Evin mövqeyini açıq ifadə edərək bildirib: “Ukraynalılar bizim onlardan nə gözlədiyimizi yaxşı bilirlər.” Bu açıqlama Vaşinqtonun Kiyevdən konkret və geri dönüşü olmayan qərar gözlədiyini göstərir.
ABŞ administrasiyası ümid edir ki, bu gün keçirilən görüşdə son maneələr aradan qaldırılacaq və bazar gününə qədər məsələnin həlli ilə bağlı yekun mövqe formalaşacaq. /Musavat.com/
