Günəş radiasiyasında həssaslıq: Aviaşirkətlər uçuşları LƏĞV ETDİ

Mərkəzi Asiya, Avropa, Amerika və Avstraliyanın bir sıra aviaşirkətləri Airbus konserninin 6 min təyyarəsində proqram təminatında Günəş radiasiyasına həssaslıqla bağlı aşkarlanan zəiflik səbəbindən uçuşlarda gecikmələr ola biləcəyi barədə xəbərdarlıq ediblər.

Turkustan.az xəbər verir ki, Qazaxıstanın “Air Astana” və “FlyArystan” aviaşirkətləri Airbus təyyarələrini proqram təminatının yenilənməsi üçün saxlayıblar.

“Air Astana uçuş cədvəlinə təsiri minimuma endirmək üçün mümkün olan hər şeyi edir, lakin dəyişikliklər və gecikmələr mümkündür. Sərnişinlərə öz uçuşlarının aktuallığını əvvəlcədən aviaşirkətlərin saytlarından yoxlamaları tövsiyə olunur”, — şirkətdən bildirilib.

Həmçinin “Air France” aviaşirkətinin 35 reysi gecikib və ya ləğv edilib. “American Airlines” 340 təyyarədə proqram təminatı yenilənməsi ilə əlaqədar “bəzi operativ gecikmələr” barədə xəbərdarlıq edib.

Avstraliyanın ucuz tarifli daşıyıcısı “Jetstar” 90 reysi ləğv edib və yeniləmənin onun təyyarə parkının təxminən üçdə birinə təsir etdiyini açıqlayıb. Yaponiya şirkəti “All Nippon Airways” (ANA) şənbə günü 65 reysi ləğv edib. Kolumbiyanın “Avianca” şirkəti problemin onun parkının 70%-dən çoxuna təsir etdiyini və buna görə də 7 dekabra qədər bilet satışının dayandırıldığını bildirib.

BBC-nin məlumatına görə, şirkət mütəxəssisləri intensiv günəş radiasiyasının uçuş idarəetmə bort kompüterlərinin işinə mane ola biləcəyini müəyyən ediblər. Zəiflik Airbus-un ən çox satılan A320 modelini, həmçinin A318, A319 və A321 təyyarələrini əhatə edir. /bizim.media/az/