Britaniyanın “The Telegraph” qəzeti Çin şirkətlərinin 2023-2024-cü illərdə Rusiyaya pilotsuz uçuş aparatlarının (PUA) istehsalında istifadə olunan hissələri və materialları tədarük etdiyini iddia edib.
Turkustan.az xəbər verir ki, Qəzetin qlobal ticarət rekordlarına əsaslanan hesabatına görə, 2023-2024-cü illərdə Çində yerləşən şirkətlər sanksiyalar altında olan Rusiya PUA istehsal edən firmalara birbaşa olaraq ən azı 47 milyon funt sterlinq dəyərində hissə və material tədarük edib.
Göndərilən hissələrə və materiallara təyyarə mühərrikləri, mikroçiplər, metal ərintiləri, kamera linzaları, fiberglas və karbon lifi kimi komponentlər daxildir.
Bu yüklərin təxminən dörddə biri İran istehsalı olan “Şahed” PUA ilə əlaqəli Rusiya Federasiyasının tərkibində olan Tatarıstan Respublikasının Alabuqa bölgəsində fəaliyyət göstərən sanksiyaya məruz qalmış Rusiya firmalarına göndərilib.
Qəzet ümumilikdə 97 Çin tədarükçüsü müəyyən edib.
Ukrayna ordusunun hava hücumundan müdafiə pilotu anonimlik şərti ilə deyib: "Biz davamlı olaraq Çindən elektron lövhələr və çiplər tapırıq, onların Çin mənşəli olduğu aydındır".
"Onların bəzilərində istehsalçı və brend məlumatı var. Mən bəzilərinin Çin hərfləri ilə yazılmış olduğunu görmüşəm", - pilot bildirib.
ABŞ 2024-cü ildə Rusiyanın Ukraynada istifadə etdiyi "Garpiya" model uzun mənzilli PUA-nın istehsalı və çatdırılmasında rol oynamaqda ittiham etdiyi iki Çin firmasına sanksiya tətbiq etdiyini açıqlamışdı.
Bəyanatda PUA-ların Ukraynanın kritik infrastrukturunu məhv etdiyi və “kütləvi itkilərə” səbəb olduğu və Çin şirkətlərinin onların istehsalına töhfə verdiyi iddia edilib.
Aytən Yaşar/ Turkustan.az
