ABŞ Prezidenti Donald Tramp İsrailin İrana qarşı hücumlarına qoşulub-qoşulmamaq barədə qərar verməyə çalışdığı bir vaxtda ABŞ B-2 strateji bombardmançılarını Sakit okeandakı Qvam adasına yerləşdirir.
Turkustan.az “Reuters”ə istinadla xəbər verir ki, bu barədə iki amerikalı rəsmi açıqlama verib.
Onların sözlərinə görə, bu addımın Yaxın Şərqdəki gərginliklərlə birbaşa bağlı olub-olmadığı hələ dəqiqləşdirilməyib.
B-2 bombardmançıları ABŞ-ın 13,6 tonluq GBU-57 “Massive Ordnance Penetrator” bombasını daşımaq imkanına malikdir. Bu bomba yerin dərin qatlarında yerləşən hədəfləri, o cümlədən İranın nüvə obyektlərindən biri olan Fordonu məhv etmək üçün nəzərdə tutulub.
Rəsmilər əlavə təfərrüatları açıqlamayıblar və qeyd ediblər ki, hələlik B-2-lərin Qvama göndərilməsindən başqa ön cəbhəyə doğru hərəkət etməsi ilə bağlı əmrlər verilməyib. B-2-lərin sayına da aydınlıq gətirilməyib. Pentaqon məsələyə dair şərh verməyib.
Hərbi ekspertlər və ABŞ rəsmiləri hazırda diqqətlə izləyirlər ki, B-2 bombardmançıları Hind okeanındakı Diyeqo Qarsiya adasında yerləşən ABŞ-Britaniya hərbi bazasına keçəcəkmi. Ekspertlər hesab edirlər ki, bu ada Yaxın Şərqdə hərbi əməliyyatlar üçün ideal mövqedədir.
Qeyd edək ki, ABŞ bu vaxta qədər B-2 bombardmançılarını Diyeqo Qarsiyada saxlayırdı, lakin ötən ay onları B-52-lərlə əvəz edib./Globalinfo.az
