Rusiya müharibənin dayandırılması və atəşkəslə bağlı Ukrayna və Rusiya tərəfləri arasında növbəti görüşün nəticəsiz qalması üçün əlindən gələni edir.
Turkustan.az xəbər verir ki, bu barədə Ukrayna prezidenti Vladimir Zelenski “Telegram” səhifəsində məlumat verib .
"Bu gün mən Türkiyənin xarici işlər naziri Hakan Fidan ilə görüşdüm. Ədalətli və davamlı sülh üçün səylərimizi dəstəklədiklərinə görə Türkiyə və Prezident Ərdoğana təşəkkür etdim. Xüsusilə görüşün təşkilində göstərdikləri köməyə görə, bundan sonra biz min insanımızı rus əsirliyindən azad etməyə nail olduq. Rusiyanın əlində olan bütün ukraynalıların geri qaytarılması bizim əsas prioritetlərimizdən biridir", - Zelenski bildirib.
Prezident Türkiyənin xarici işlər naziri ilə Ukrayna və tərəfdaşlarının diplomatik səylərini müzakirə etdiyini də vurğulayıb.
"Biz Türkiyənin aydın mövqeyinə - Ukraynanın suverenliyinə və ərazi bütövlüyünə ardıcıl və tam dəstəyə görə minnətdarıq. Rusiya dünyanın atəşkəslə bağlı bütün çağırışlarına məhəl qoymur və qətlləri davam etdirir. Bundan əlavə, bir həftədən çoxdur ki, ruslar "memorandum" adlanan sənədi təqdim edə bilmirlər".
Zelenski həmçinin xatırladıb ki, Ukrayna Rusiya tərəfi ilə növbəti görüşün gündəliyi ilə bağlı heç bir sənəd almayıb. Bundan əlavə, Rusiya Federasiyası məhbus mübadiləsindən sonra müzakirəsi planlaşdırılan memorandumun mətnini ictimaiyyətə açıqlamayıb.
"Ukrayna onlardan heç bir sənəd almayıb. Türkiyə də almayıb. Görüşün boş olmaması üçün onun gündəmini başa düşmək və danışıqlara düzgün hazırlaşmaq lazımdır. Təəssüf ki, Rusiya növbəti mümkün görüşün nəticəsiz qalması üçün hər şeyi edir. Biz Türkiyə ilə diplomatiyanın işləməsi üçün bütün işlərimizi yüksək qiymətləndiririk", - o əlavə edib.
Aytən Yaşar/ Turkustan.az
