“Əgər ölkədə “ağıl axını” varsa, yəni savadlı insanlar ölkəni tərk edirsə, deməli, burada savadlıların qalması üçün şərait yoxdur. Savadı olmayanlar isə məcbur qalıb burada qəpik-quruşa işləyirlər. Bu, ölkədən ağıllı və peşəkar kadrların kütləvi şəkildə getməsi deməkdir və bu, çox ciddi problemdir”.
Turkustan.az xəbər verir ki, bunu Demokrat.az-a açıqlamasında sosioloq Əhməd Rəhmanov deyib.
O, bildirib ki, hazırda bəzi iri şirkətlər və müəssisələr ucuz işçi qüvvəsi üçün xaricdən işçi gətirirlər:
“Məsələn, Bakıətrafı qəsəbələrə gedəndə görürsən ki, gündüz çox görünməsələr də, axşam saatlarında müxtəlif ölkələrdən gəlmiş işçilər gözə çarpır — hindlilər, çinlilər, digər asiyalılar və s. Əvvəllər xaricdən bir-iki belə insan görəndə bu qeyri-adi qəbul olunurdusa, indi onların sayı əhəmiyyətli dərəcədə artıb”.
O, bildirib ki, bu tendensiya davam edərsə, zamanla etnik strukturda dəyişiklik riski yarana bilər:
“Bu artıq təkcə iqtisadi yox, həm də sosial və demoqrafik məsələdir. Dünya üzrə qəbul olunmuş reallıq budur ki, ölkədə idarəetmə, daxili siyasət və iqtisadiyyat düzgün qurulmadıqda belə proseslər qaçılmaz olur”.
