Rumıniyada hər kəsi təəccübləndirən müəmmalı hadisə yaşanıb. 30 il əvvəl yoxa çıxan adam, əynində eyni paltarla geri qayıdıb.
Turkustan.az xəbər verir ki, bu barədə “Daily Mail” məlumat yayıb.
Bildirilib ki, Rumıniyada yaşayan maldar Vasile Qorqos 1991-ci ildə, 63 yaşı olarkən “bir-iki günə qayıdacağam” deyərək evdən çıxıb. Daha sonra heç bir xəbər alınmayan Qorqos illərdir axtarılsa da, bu, nəticəsiz qalıb.
Hər kəs onun öldüyünü düşünərkən, 29 avqust 2021-ci ildə bir avtomobil Qorqosu yoxa çıxanda üzərində olan eyni paltar ilə evinin önünə gətirərək, sürətlə uzaqlaşıb. Artıq 93 yaşında olan Qorqos heç nəyi xatırlamayıb. O, sadəcə 1991-ci ilə qədərki dövrü xatırlayıb. Onu gətirən sürücünün şəxsiyyəti indiyədək müəyyən edilməyib.
Diqqətçəkən məqamlar biri isə 30 il keçməsinə rəğmən üzərindəki paltarın və cibində 1991-ci ildə aldığı səyahət biletinin qəti şəkildə köhnəlməməsi olub.
Məsələ ilə bağlı heç bir rəsmi açıqlamanın verilməməsi ictimaiyyət arasında bəzi şayiələrin yayılmasına səbəb olub. Bəziləri Qorqosun hökumət tərəfindən gizli təcrübələrdə istifadə olunduğunu, bəziləri isə yadplanetlilər tərəfindən qaçırıldığını iddia edir. Ancaq bu iddiaları təsdiqləyən heç bir dəlil yoxdur. /publika.az/
