Getdikcə daha çox insan “ChatGPT”-dən şəxsi məsləhət üçün və hətta bir növ terapevt kimi istifadə edir.
Lakin bu söhbətlər əsl peşəkarla söhbətdəki kimi məxfiliyə malik deyil, yəni məlumatlaırnız yayıla bilər.
Turkustan.az xəbər verir ki, bu barədə “OpenAI” baş direktoru Sam Altman “Theo Wong” ilə podkastda danışıb.
Hüquqi müdafiənin olmaması
Altman qeyd edib ki, “ChatGPT” ilə xüsusən də həssas mövzularda söhbətlər məhkəmə zamanı ifşa oluna bilər. Qanuni məxfilik qaydaları (məsələn, tibbi və ya vəkil-müştəri imtiyazı) ilə qorunan terapevt, həkim və ya vəkil ilə söhbətlərdən fərqli olaraq, “ChatGPT” ilə paylaşılan data eyni qorumalara malik deyil:
"Əgər ən şəxsi problemləriniz barədə “ChatGPT” ilə danışırsınızsa və sonra məhkəməyə müraciət etsəniz, biz bu məlumatları təhvil verməyə məcbur ola bilərik. Bu, çox yanlışdır".
O vurğulayıb ki, süni intellektlə söhbətlərin məxfiliyi məsələsi peşəkar terapevtlə ünsiyyətdə olduğu kimi qorunma səviyyəsini təmin etmək üçün təcili diqqət tələb edir.
Artan populyarlıq və risklər
Altmanın sözlərinə görə, xüsusilə gənc istifadəçilər psixoloji dəstək, həyat məsləhətləri və ya əlaqələr məsləhətləri üçün getdikcə daha çox “ChatGPT”-ə müraciət edirlər. Bununla belə, “WhatsApp” və ya “Signal” kimi şifrələnmiş messencerlərdən fərqli olaraq, “OpenAI” istifadəçilərin “ChatGPT” ilə yazışmalarına giriş imkanına malikdir. Bu məlumatlar şirkətin əməkdaşları tərəfindən AI modelini təkmilləşdirmək və ya pozuntulara nəzarət etmək üçün istifadə edilə bilər.
“OpenAI”-nin məlumat saxlama siyasətinə əsasən, şirkətdən hüquqi və ya təhlükəsizlik səbəbləri ilə onları qorumaq tələb olunmadığı halda “ChatGPT” “Free”, “Plus” və “Pro”-da silinmiş söhbətlər 30 gündən sonra həmişəlik silinir.
Məsələn, 2025-ci ilin iyun ayında “The New York Times” və digər nəşrlər “OpenAI”-a qarşı məhkəmə iddiası qaldıraraq, bütün “ChatGPT” istifadəçi jurnallarının, o cümlədən silinənlərin müəllif hüquqlarının pozulması ilə bağlı işin bir hissəsi kimi saxlanılmasını tələb etdilər.
Psixoloji və sosial problemlər
Altman, həmçinin süni intellekt və sosial medianın psixoloji təsiri ilə bağlı narahatlıqlarını ifadə edib. O qeyd edib ki, bəzi gənclər qərar qəbul edərkən “ChatGPT”-də həddən artıq asılılıq nümayiş etdirirlər. Bundan əlavə, 2025-ci ilin fevralında ata olan Altman uşaqların sosial platformalardan asılılığı ilə bağlı riskləri vurğulayıb.
Bu istifadəçilər üçün nə deməkdir?
Qanun süni intellektlə qarşılıqlı əlaqəyə uyğunlaşdırılana qədər “ChatGPT” istifadəçiləri bilməlidirlər ki, onların şəxsi söhbətləri tamamilə məxfi olmaya bilər. Şəxsi və ya həssas mövzuları müzakirə etmək üçün “ChatGPT”-dən istifadə edirsinizsə, bu məlumatların hüquqi proseslərdə açıqlana biləcəyini və ya modeli təkmilləşdirmək üçün istifadə oluna biləcəyini nəzərə almağa dəyər.
Altman, süni intellekt istifadəçilərinin peşəkarlarla ünsiyyət qurarkən olduğu kimi eyni qorumalara malik olmasını təmin etmək üçün bu problemin tezliklə həllinə çağırır. /cebheinfo.az/
