İran İnqilab Keşikçiləri Korpusu (İİKK) İordaniyada yerləşən Şahzadə Həsən Hava Bazasına ballistik raketlərlə hücum edildiyini açıqlayıb.
Turkustan.az xəbər verir ki, İİKK-nin bəyanatında iddia olunur ki, hücum zamanı ABŞ-a məxsus RQ-4 və MQ-9 tipli pilotsuz uçuş aparatlarının yerləşdiyi anqarlar hədəfə alınıb. Hücum nəticəsində bir neçə dronun məhv edildiyi, bəzi ABŞ hərbçilərinin öldüyü və bazanın texniki infrastrukturunda yanğınların baş verdiyi iddia edilir.
İran tərəfi hücumun ABŞ-ın İranın Hörmüzqan əyalətində toy mərasiminə endirdiyi zərbəyə cavab olduğunu bildirib. Tehran həmin hücum nəticəsində 70 nəfərin təsirləndiyini, biri uşaq olmaqla 4 nəfərin öldüyünü və bir neçə şəxsin ağır yaralandığını iddia edib.
İİKK həmçinin Şahzadə Həsən Hava Bazasına hücumun görüntülərini yayıb.
ABŞ və İordaniya tərəfləri isə İranın hücum və itkilərlə bağlı irəli sürdüyü iddiaları hələlik rəsmi şəkildə təsdiqləməyib.
Aytən Yaşar/ Turkustan.az
