ABŞ prezidenti Donald Trump cümə axşamı bildirib ki, Avropa İttifaqına ticarət sazişi üzrə öhdəliklərini yerinə yetirmək üçün 4 iyul tarixinədək vaxt verəcək.
Turkustan.az xəbər verir ki, əks halda, o, avtomobillər də daxil olmaqla Aİ məhsullarına tətbiq olunan tariflərin “daha yüksək səviyyələrə” qaldırılacağını bəyan edib.
Tramp “Truth Social” platformasında paylaşdığı açıqlamada bildirib ki, yeni son tarix Ursula von der Leyen ilə keçirdiyi “çox yaxşı söhbət” zamanı müəyyənləşdirilib. O qeyd edib ki, görüş zamanı tərəflər İranın heç vaxt nüvə silahına sahib olmamalı olduğu məsələsində də ortaq mövqedən çıxış ediblər.
ABŞ prezidenti əlavə edib ki, ötən il Şotlandiyanın Turnberry şəhərində imzalanmış ticarət sazişi çərçivəsində Aİ-nin üzərinə düşən öhdəlikləri yerinə yetirməsini səbirlə gözləyib.
“Aİ razılaşmanın öz hissəsini yerinə yetirəcəyinə və tariflərini razılaşdırıldığı kimi sıfıra endirəcəyinə söz vermişdi. Mən onlara ölkəmizin 250 illik yubileyinədək vaxt verməyə razılaşdım. Əks halda, təəssüf ki, tariflər dərhal daha yüksək səviyyələrə qaldırılacaq”, — deyə Tramp bildirib.
O, bununla 4 iyulda qeyd olunan ABŞ-ın Müstəqillik Gününə işarə edib.
Aytən Yaşar/ Turkustan.az
