ABŞ İran yaxınlığında hərbi mövcudluğunu gücləndirir. İordaniyanın şərqində yerləşən Mavafaq əl-Salti aviabazasında müasir “THAAD” raketdən müdafiə sisteminin yerləşdirilməsi başa çatdırılıb. Kompleksə altı buraxılış qurğusu, 36 raket-tutucu və böyük hündürlükdə ballistik raketləri məhv etməyə qadir AN/TPY-2 radarı daxildir.
Turkustan.az xəbər verir ki, bu barədə İsrailin “Maariv” nəşri məlumat yayıb.
Peyk görüntülərinə əsasən, sistem tam döyüş hazırlığı vəziyyətinə gətirilib və ABŞ-ın regiondakı müdafiə strategiyasının əsas elementlərindən birinə çevrilib. Aviabazada yanvar və fevral aylarında bölgəyə göndərilən “F-15E Strike Eagle” qırıcıları və “A-10” Warthog hücum təyyarələri də yerləşdirilib.
Pentaqon İranın ballistik raket təhdidlərinə qarşı müdafiəni gücləndirmək məqsədilə əlavə THAAD və Patriot sistemlərinin regiona yerləşdirildiyini təsdiqləyib. Dəniz qüvvələri və aviadaşıyıcılarla birlikdə bu, ABŞ hərbçiləri və tərəfdaşları üçün Yaxın Şərqdə genişmiqyaslı müdafiə qalxanı yaradır.
ABŞ prezidenti Donald Tramp administrasiyası İranın nüvə proqramı ilə bağlı diplomatik danışıqlarda irəliləyişin olduğunu bildirsə də, THAAD və digər sistemlərin yerləşdirilməsi Vaşinqtonun istənilən təhdidə dərhal cavab verməyə hazır olduğunu göstərir. /Globalinfo.az/
