Xəbər verdiyimiz kimi, Ukrayna Prezidenti müharibənin gedişi ilə bağlı növbəti açıqlaması ilə diqqət çəkib.
O bildirib ki, Ukrayna bütün Donbas ərazisini könüllü şəkildə Rusiyaya versə, bu işğalçıların Xarkov və Dneprə gedən yolunun açılması demək olacaq.
Zelenski xatırladıb ki, Rusiya 2014-cü ildə plazdarm kimi istifadə etmək və Ukraynanın cənubunu müasirəyə almaq üçün Krımı işğal edib. Rusiya həmçinin şərqdə işğal etdiyi ərazilərdən də plazdarm kimi yararlanıb.
“Əgər sabah biz hansısa bir formada Donbası tərk etsək, hansı ki, bu baş verməyəcək, Putin üçün milyon yarımlıq əhalisi olan Xarkova gedən yolu açmış olacağıq. Belədə o, həmçinin sənaye şəhəri olan Dnepri də işğal edəcək. Bu isə Putinə yeni imkanlar açacaq”, deyə Zelenski bildirirb.
Zelenski onu da qeyd edib ki, Rusiya bütün Ukraynanı işğal edə bilsə, sonrakı mərhələdə Avropanın içərilərinə doğru irəliləmək üçün ondan plazdarm kimi istifadə edəcək.
Ukrayna Donbasdan sonra Xarkov və Dnepri də itirə bilərmi?
Mövzu ilə bağlı Bizim.Media-ya açıqlama verən hərbi ekspert Ramil Məmmədlinin fikrincə, müharibənin xarakteristikası onu deməyə əsas verir ki, faktiki olaraq Ukrayna əsas döyüş mövqelərinin bir çoxunu itirib:
“Xüsusən də daha qızğın döyüşlərin getdiyi Donbas bölgəsində. Donetsk vilayətinin 80 faizi artıq Rusiyanın əlindədir. Kiyev yerdə qalan 20 faizin müdafiəsini təşkil etməyə çalışır. Luqansk isə demək olar tamamilə Rusiyanın nəzarəti altındadır”.
“Zelenskinin dedikləri bu gün üçün nəzərdə tutulmayıb”.
Həmsöhbətimizə görə, Ukrayna Prezidenti Zelenskinin səsləndirdiyi fikir başqa məna kəsb edir:
“Burada söhbət sülh dövründən sonra risklərin necə olacağı, prosesin gələcəkdə hansı formada inkişaf edəcəyindən gedir. Yəni atəşkəs imzalanarsa, Kiyev NATO-ya üzv olmamaqla bağlı şərtlərlə razılaşıb, müvafiq sənədlərə imza atarsa, Donbası tamamilə itirdiyini hüquqi baxımdan açıqlayarsa, sözsüz ki, Rusiyanın hücum üçün növbəti addımı Xarkov və Dnepr vilayətləri də ola bilər.
Amma bu hazırkı dövr üçün nəzərdə tutulmayıb, gələcək üçün nəzərdə tutulan fikirdir. Necə ki, 2014-cü ildə Ukrayna Krımı, habelə Donetsk və Luqansk şəhərlərini itirəndə sonrakı vəziyyətin hansı forma alacağı artıq əvvəlcədən bəlli idi. O, baxımdan hesab edirəm ki, Zelenski haqlıdır.
Belə bir vəziyyət yaranarsa, yəni Kiyev hüquqi baxımdan verdiyi itkilərlə razılaşarsa, ardınca birmənalı olaraq problem qeyd olunan formada davam edəcək. Amma bu cari və gələn ilin məsələsi deyil”.
Ekspert qeyd edir ki, Rusiyanın qarşısında dayanan əsas tapşırıqlar Xarkovla Odessanı ələ keçirmək və Ukraynanın Qara dənizə çıxış imkanlarını maksimum məhdudlaşdırmaqdır.
