ABŞ Müdafiə Nazirliyinə bağlı Müdafiə Təhlükəsizliyi Əməkdaşlıq Agentliyi (DSCA) satışla bağlı yazılı açıqlama yayıb.
Turkustan.az xəbər verir ki, ABŞ Dövlət Departamenti, təxmini dəyəri 825 milyon dollar olan "Havadan Çatdırılan Sursatlar" və əlaqədar avadanlıqların Ukrayna hökumətinə mümkün satışına razılıq verib.
Məlumata görə, Ukrayna bu paket çərçivəsində Qlobal Mövqe Müəyyənetmə Sistemləri ilə uyğun olan 3.350 ədəd Uzun Mənzilli Hücum Sursatı (ERAM) raketi və əlaqədar avadanlıqların alınmasını istəyib. Satışla bağlı rəsmi bildiriş ABŞ Konqresinə təqdim edilib.
Açıqlamada qeyd olunur ki, satış paketinə raket konteynerləri, ehtiyat hissələri, dəstək avadanlığı, proqram təminatı, texniki sənədlər, təlim və logistika materialları daxildir.
Eyni zamanda vurğulanır ki, bu satış bölgədəki "əsas hərbi balansı" dəyişməyəcək. “Satış, Avropada siyasi sabitliyin və iqtisadi inkişafın təminatçısı olan bir müttəfiqin təhlükəsizliyini gücləndirməklə, ABŞ-ın xarici siyasət və milli təhlükəsizlik məqsədlərinə xidmət edəcək”, – deyə DSCA-nın açıqlamasında bildirilib.
Qeyd edək ki, Ukrayna bu silah alımını ABŞ-ın Xarici Hərbi Maliyyələşdirmə (FMF) proqramı çərçivəsində Danimarka, Hollandiya və Norveç kimi ölkələrin maliyyə dəstəyi ilə həyata keçirəcək. Satışın baş tutması üçün ABŞ Konqresinin yekun təsdiqi tələb olunur.
Aytən Yaşar/ Turkustan.az
