Fransa Prezidenti Emmanuel Makron Fransa-Almaniya tərəfdaşlığının iqtisadi, ticarət, maliyyə və geosiyasi baxımdan daha güclü bir Avropa üçün tam uyğunluq təşkil etdiyini bildirib.
Turkustan.az xəbər verir ki, Makron yay tətilini keçirdiyi Breqançon qalasında Almaniya Kansleri Fridrix Merzi qəbul edib.
Sabah baş tutacaq Fransa-Almaniya Birgə Nazirlər Şurası və Fransa-Almaniya Müdafiə və Təhlükəsizlik Şurasının iclasları ərəfəsində mətbuata açıqlama verən Makron, son dövrlərdə iki ölkə arasında münasibətlərdə yeni bir mərhələyə keçid baş verdiyini qeyd edib.
Makron bildirib ki, sabahkı danışıqlar əməkdaşlığın daha da gücləndirilməsi baxımından dönüş nöqtəsi olacaq:
“Fransa-Almaniya tərəfdaşlığı bu gün iqtisadi, ticarət və maliyyə baxımından güclü bir Avropa yaratmaq, həmçinin Rusiyanın Ukraynadakı müharibəsi fonunda qitənin geosiyasi mövqeyini qorumaq üçün ideal şəkildə uyğunlaşdırılıb”.
Almaniya Kansleri Fridrix Merz isə Ukrayna müharibəsinə ortaq yanaşmanın vacibliyini vurğulayaraq bildirib:
“Elə məsələlər var ki, yalnız birlikdə hərəkət etsək, həll edə bilərik.”
Merz həmçinin iqtisadi əməkdaşlığın dərinləşdirilməsinə çağıraraq, Avropa İttifaqında bürokratik maneələrin azaldılmasının vacibliyini qeyd edib. O, bunun Avropa ölkələrinin daha çevik və effektiv fəaliyyət göstərməsi üçün mühüm şərt olduğunu deyib.
Aytən Yaşar/ Turkustan.az
