ATİB-in təşkilatçılığı ilə “Suveren Azərbaycan – Biznesdə yeni cığır” mövzusunda konfrans keçirilib
Azərbaycan-Türkiyə İş Adamları Birliyi (ATİB) “Suveren Azərbaycan – Biznesdə yeni cığır” mövzusunda konfrans keçirib. Konfransda Türkiyənin Azərbaycandakı səfiri Birol Akgün, dövlət rəsmiləri, iş adamları və media nümayəndələri iştirak edib.
Şəhid övladlarından ibarət “Zəfər sədası” uşaq xorunun ifası
ATİB-dən verilən məlumata görə, tədbir Azərbaycan və Türkiyə dövlət himnlərinin səsləndirilməsi ilə başlayıb.
Tədbir zamanı
Daha sonra Ümummilli Lider Heydər Əliyevin, Mustafa Kamal Atatürkün, həmçinin şəhidlərin xatirəsi bir dəqiqəlik sükutla yad edilib. Tədbirin rəsmi hissəsinə başlamazdan öncə şəhid övladlarından ibarət “Zəfər sədası” uşaq xorunun ifası dinlənilib.
Mürsəl Rüstəmov: Məqsəd ATİB-in üzvlərinin fəaliyyətini geniş ictimaiyyətə təqdim etməkdir
Məlumata əsasən, konfransda ATİB sədri Mürsəl Rüstəmov çıxış edərək bildirib ki, təşkilat üzvləri həm tikinti və infrastruktur layihələrində, həm də sosial layihələrdə yaxından iştirak edib, eyni zamanda işğaldan azad olunmuş ərazilərə sərmayə qoymaqla yeni iş yerləri yaradıb, iqtisadiyyatın inkişafına təkan veriblər: “Bu gün məqsəd ATİB-in üzvlərinin fəaliyyətini geniş ictimaiyyətə təqdim etmək, ATİB olaraq Azərbaycanın inkişafı və rifahı naminə bütün fəaliyyətlərdə əlimizdən gələni əsirgəmədiyimizi və bundan sonra da əsirgəməyəcəyimizi nümayiş etdirməkdir. Azərbaycan-Türkiyə İş Adamları Birliyinin üzvləri də Qarabağın yenidən qurulması və bərpası prosesindən kənarda qalmayıb, hər biri müvafiq sahədə aparılan işlərə öz töhfələrini veriblər”.
Mürsəl Rüstəmov
M.Rüstəmov deyib ki, Türkiyə Vətən müharibəsinin ilk günündən Azərbaycanın yanında olub, siyasi və mənəvi dəstək göstərib, tarixi qardaşlıq bağlarımız strateji müttəfiqlik mərhələsinə yüksəlib: “Müharibədən sonrakı dövrdə də qardaş ölkənin şirkətləri Qarabağın bərpasına ilk qoşulanlardan olub”.
Orxan Məmmədov: Bu proseslər biznes üçün də aydın və proqnozlaşdırılan mühit formalaşdırır
Daha sonra Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov çıxış edib. KOBİA sədri deyib ki, işğaldan azad olunmuş ərazilərdə aparılan genişmiqyaslı bərpa və quruculuq işləri paralel şəkildə iqtisadi həyatın formalaşmasına zəmin yaradır. Onun sözlərinə görə, dövlət bu ərazilərdə infrastruktur qurur, yaşayış məntəqələri salır, enerji və nəqliyyat təminatını yaradır: “Bu proseslər biznes üçün də aydın və proqnozlaşdırılan mühit formalaşdırır. KOBİA olaraq biz bu prosesdə sahibkarın yanında olmağı prioritet hesab edirik. Məqsədimiz təşəbbüslərin təşviqi ilə yanaşı, onların real iqtisadi dövriyyəyə çevrilməsinə dəstək verməkdir. İşğaldan azad olunmuş ərazilərlə bağlı KOBİA ya daxil olan minlərlə müraciət bunu açıq şəkildə göstərir. Bu müraciətlər sahibkar marağının ölçüsünü və bazarın gözləntisini əks etdirir”.
Orxan Məmmədov
Orxan Məmmədov qeyd edib ki, bu mühit birgə layihələrin, ortaq investisiyaların və yeni əməkdaşlıq modellərinin yaranmasına şərait yaradır: “İşğaldan azad olunmuş ərazilərdə Türkiyə şirkətlərinin fəal iştirakı da bu əməkdaşlığın real nəticəsidir. KOBİA həm də Türkiyənin bölgələri ilə biznes əməkdaşlığının genişləndirilməsi istiqamətində fəaliyyət göstərir”.
Məmməd Musayev: Türkiyə bizim üçün sadəcə ticarət tərəfdaşı deyil – strateji müttəfiq, qardaş ölkə və ortaq iqtisadi taleyə sahib tərəfdaşdır
Konfransda çıxış edən Azərbaycan Sahibkarlar Konfederasiyasının prezidenti Məmməd Musayev bildirib ki, Prezident İlham Əliyevin həyata keçirdiyi uğurlu siyasətin nəticəsidir ki, cari ilin yanvar-noyabr aylarında ölkədə 116 milyard manatdan çox və ya əvvəlki ilin eyni dövrü ilə müqayisədə 1,6 faiz çox ümumi daxili məhsul istehsal edilib, əlavə dəyər iqtisadiyyatın qeyri neft-qaz sektorunda 3,2 faiz artıb.
Məmməd Musayev
Onun sözlərinə görə, iqtisadi artım işgüzar aktivliyin və sahibkarların sayının ildən-ilə artmasına səbəb olub. 2019-cu il yanvarın 1-i ilə müqayisədə 2025-ci il noyabrın 1-i tarixinə ölkədə aktiv vergi ödəyicilərinin sayı 2 dəfə artaraq 845 min nəfərdən çox olub: “Qeyri-neft sektorunun genişlənməsi, sahibkarlığın təşviqi, investisiya mühitinin yaxşılaşdırılması və dövlət–özəl tərəfdaşlığının gücləndirilməsi istiqamətində ardıcıl və sistemli addımlar atılır. Bu siyasətin mərkəzində isə sahibkarlığın inkişafı dayanır. Bu kontekstdə Azərbaycan–Türkiyə iqtisadi əməkdaşlığı xüsusi yer tutur. Türkiyə bizim üçün sadəcə ticarət tərəfdaşı deyil – strateji müttəfiq, qardaş ölkə və ortaq iqtisadi taleyə sahib tərəfdaşdır. Bizim bizneslərimizin dili, mədəniyyəti, riskə baxışı və gələcək ambisiyaları üst-üstə düşür”.
Birol Akgün: İki qardaş ölkə arasında əməkdaşlıq hər keçən gün daha da dərinləşir
Konfransda çıxış edən Türkiyənin Azərbaycandak səfiri Birol Akgün iki ölkə arasında bütün sahələrdə, o cümlədən iqtisadi və ticarət sahəsində əməkdaşlığın hər keçən gün daha da dərinləşdiyini deyib.
Birol Akgün
O, qeyd edib ki, bu prosesdə hər iki ölkənin iş adamları da fəal rol oynayırlar: “Elə dekabrın 23-də TÜİB və “MÜSİAD Azərbaycan”ın, dekabrın 24-də isə ATİB-in keçirdiyi tədbirlər də bunu bird aha təsdiqləyir”.
Panel zamanı
Daha sonra konfrans panel müzakirələri ilə davam edib. Qeyd edək ki, birinci panel Kiçik və Orta Biznesin İnkişafı Agentliyinin nümayəndəsi Eldəniz Əmirovun, ikinci panel isə Qarabağ Dirçəliş Fondunun Fandreyzinq və Kommunikasiya şöbəsinin müdiri Pərvin Bağırovanın moderatorluğu ilə reallaşıb.
Şəhid övladlarına hədiyyələr təqdim olunub
Sonda panel iştirakçılarına təşəkkürnamələr, şəhid övladlarına isə hədiyyələr təqdim olunub. Konfrans xatirə fotosunun çəkilməsi ilə başa çatıb.
