Azərbaycan Respublikasının Elm və Təhsil Nazirliyinin qeyri-hökumət təşkilatları üçün elan etdiyi “Təhsildə könüllü fəaliyyətin təşkili” qrant müsabiqəsinin qalibi olan “Dədə Ələsgər Ocağı” İctimai Birliyi tərəfindən həyata keçirilən “Tariximizin İşığında – Qərbi Azərbaycanın izi ilə” layihəsi çərçivəsində keçirilmiş esse müsabiqəsinin qalib yazılarından ibarət kitabın təqdimatı keçrildi.
Tədbiri “Dədə Ələsgər Ocağı” İctimai Birliyinin sədri, Dədə Ələsgərin nəticəsi Xətai Ələsgər açaraq qonaqları salamladıqdan sonra müsabiqə haqqında məlumat verərək bildirdi ki, Azərbaycan Respublikasının tam orta məktəblərinin 10–11-ci sinif şagirdləri, həmçinin peşə və kollec tələbələrinin Qərbi Azərbaycan mövzusunda biliklərini, analitik düşüncəsini və yaradıcılıq bacarıqlarını qiymətləndirmək məqsədilə belə bir layihə ilə Azərbaycan Respublikasının Elm və Təhsil Nazirliyinin qeyri-hökumət təşkilatları üçün elan etdiyi “Təhsildə könüllü fəaliyyətin təşkili” qrant müsabiqəsinə müraciət edilmişdir.
Tədbirin aparıcısı “Dədə Ələsgər Ocağı” İctimai Birliyinin İdarə Heyətinin üzvü Taleh Əliyev qeyd etdi ki, müsabiqəyə ölkənin müxtəlif bölgələrindən yüzlərlə esse təqdim olunmuş və münsiflər heyəti tərəfindən müəyyən olunmuş meyarlara əsasən qiymətləndirilmişdir. Nəticələrə əsasən, ölkə üzrə 14 Regional Təhsil İdarəsi üzrə I, II və III yerlərin qalibləri müəyyən edilmişdir. Müsabiqə şərtlərinə görə hər regional üzrə I yer üzrə 1 esse, II yer üzrə 2 esse, III yer üzrə 3 esse qalib elan edilmişdir. Beləliklə, ümumilikdə 84 esse seçilərək kitabda toplanmışdır. Nəşrdə gənclərin Qərbi Azərbaycan tarixinə, mədəni irsinə, deportasiya yaddaşına və milli kimlik mövzularına dair yaradıcı baxışları və analitik yanaşmaları öz əksini tapır. Qaliblərə diplom, fəxri fərman və təşəkkürnamələr təqdim olunacaqdır. Növbəti söz “Dədə Ələsgər Ocağı” İctimai Birliyinin İdarə Heyətinin üzvü və “Tariximizin İşığında – Qərbi Azərbaycanın izi ilə” layihəsinin rəhbəri Rəşid Süleymanova verildi. Azərbaycan Respublikasının Elm və Təhsil Nazirliyinə təşəkkür edən Rəşid Süleymanov bildirdi ki, bu kitab gənc nəsl arasında Qərbi Azərbaycan mövzusunun gündəmə gətrilməsində bu layihənin müstəsna əhəmiyyəti oldu. Hər bir məktəbli bu barədə ən azından məlumatlandırıldı. Nəşr olunan bu kitab isə bu mövzunu hələ bir müddətdə gündəmdə saxlayacaqdır. Sonra Münsüflər Heyətinin üzvü şair, pulisist, tərcüməçi Rəfail Tağızadə kitab haqqında danışaraq qeyd etdi ki, müsabiqəyə təqdim olunan esselərin hamısında demək olar ki, gənclərin vətən sevgisi çox açıq –aydın hiss olunurdu. Burdanda belə qənaitə gələ bilərik ki, yetişən gənclik Qərbi Azərbaycanı unutmayıb və bir gün o torpaqlara dönəcəyimiz günü gözləyirlər.
Təqdimatda iştirak edən tanınmış ziyalılar, elm adamları, saz və söz ustadları, mədəniyyət nümayəndələri müsabiqənin əhəmiyyətindən və gənclərin Qərbi Azərbaycan mövzusuna göstərdiyi diqqətdən bəhs etdilər. Tədbirdə kitabın mövzusu, esselərin ideya istiqamətləri və gənclərin milli-mədəni yaddaşın qorunmasına verdiyi töhfələr xüsusi vurğulanıb.
