Təbiətdə gəzərkən ayağınıza ilişən, çox vaxt dəyərsiz hesab edilərək kənara atılan bəzi daşlar milyonlarla il ərzində formalaşmış kristallarla zəngin ola bilər. Bu daşlar geod adlanır və son illərdə yalnız kolleksiyaçıların deyil, həm də zərgərlik dünyasının diqqətini cəlb edir.
Turkustan.az xəbər verir ki, mütəxəssislərin sözlərinə görə, bu daşların yaranması çox uzun bir prosesdir.
Geoloqlar bildirirlər ki, vulkanik süxurların içində əmələ gələn boşluqlara zamanla minerallarla zəngin su sızır. Bu suyun tərkibindəki maddələr yavaş-yavaş kristallaşaraq illər ərzində böyüyür. Bu prosesdə temperatur, təzyiq və mineral tərkibi əsas rol oynayır. Xüsusilə ametist və kvars kimi kristalların olduğu geodlar həm estetik, həm də maddi baxımdan daha dəyərli sayılır.
Zərgərlik dizaynerləri də geodlara böyük maraq göstərirlər. Bir çox ustalar geodların içindəki kristalları kəsərək boyunbağı, üzük və sırğa kimi aksesuarlarda istifadə edirlər.
Bununla yanaşı, bazarda saxta şəkildə rəngləndirilmiş geodların da olduğu bildirilir. Buna görə də həqiqi geodu tanımaq üçün diqqətli olmaq vacibdir. Təbii geodların iç quruluşu nizamsız olsa da, harmonik kristal paylanmasına malik olur. Həddindən artıq parlaq və tək rəngli daşlar isə çox vaxt emal olunmuş olur.
Mütəxəssislər qeyd edirlər ki, təbiətdəki hər bir daş potensial dəyərə malik ola bilər. Xüsusilə çay yataqlarında və ya qədim vulkanik ərazilərdə rast gəlinən maraqlı formalı daşlara diqqətlə yanaşmaq tövsiyə olunur. /Musavat.com/
