Türkiyənin yüksəkvəzifəli nümayəndə heyəti danışıqlar üçün Suriyaya səfər edib.
Turkustan.az xəbər verir ki, Türkiyənin xarici işlər naziri Hakan Fidan, milli müdafiə naziri Yaşar Gülər və Milli Kəşfiyyat İdarəsinin (MİT) direktoru İbrahim Kalın danışıqlar aparmaq məqsədilə Suriyaya səfər ediblər. Səfərin SDF terror təşkilatının Suriya ordusuna inteqrasiyası üçün müəyyən edilmiş son tarixdən cəmi doqquz gün əvvəl baş tutması diqqət çəkir.
Danışıqlar çərçivəsində 8 dekabrda Əsəd rejiminin devrilməsinin birinci ildönümündən sonra keçirilən bu səfər zamanı Türkiyə–Suriya münasibətlərinin son bir ildə keçdiyi inkişaf yolunun siyasi, iqtisadi və təhlükəsizlik aspektləri üzrə hərtərəfli qiymətləndirilməsi gözlənilir. Səfər zamanı, həmçinin Türkiyənin milli təhlükəsizlik prioritetləri baxımından mühüm əhəmiyyət daşıyan 10 mart Sazişinin icra vəziyyəti müzakirə ediləcək.
Bununla yanaşı, İsrailin təcavüzü səbəbindən Suriyanın cənubunda yaranmış təhlükəsizlik risklərinin də gündəmdə olacağı bildirilir.
Türkiyə və Suriyanın ortaq maraqları, eləcə də Suriyanın İŞİD-ə qarşı Beynəlxalq Koalisiyada (İİKK) son iştirakı kontekstində, Suriyada mümkün sabitlik boşluğundan istifadə etməyə çalışan İŞİD-in yenidən canlanmasının qarşısının alınması məqsədilə əməkdaşlıq imkanları da müzakirə olunacaq.
Görüşün əsas mövzularından biri olan təhlükəsizlik məsələləri ilə yanaşı, Suriyanın yenidən qurulması üçün ikitərəfli layihələr nəzərdən keçiriləcək, həmçinin Suriya hökumətinin potensialının artırılmasına yönəlmiş təşəbbüslərə dəstək məsələləri qiymətləndiriləcək.
Qeyd olunur ki, Türkiyənin Dəməşqdəki səfiri təyin edilmiş xarici işlər nazirinin müavini Nuh Yılmazın da danışıqlarda iştirakı gözlənilir.
Aytən Yaşar/ Turkustan.az
