ABŞ–İran arasında artan hərbi gərginlik dollar məzənnəsinə təsirsiz ötüşmür. Qısa müddətdə dolların “təhlükəsiz liman” kimi möhkəmlənəcəyi gözlənilsə də, uzunmüddətli perspektivdə risklərin artacağı istisna edilmir.
Pravda.az-a açıqlama verən iqtisadçı Xalid Kərimlinin sözlərinə görə, ABŞ-İran müharibəsi dolların qiymətini artırıb.
O bildirib ki, müharibədən əvvəl dollar daha ucuz olub: “Müharibə dövründə və indi də dollar öncəki dövrlə müqayisədə daha bahadı. Bunun iki səbəbi var. Baxmayaraq ki, ABŞ müharibə aparır, müharibənin ən az təsirləri məhz bu dövlətədir. Çünki ABŞ müharibədən uzaqdır, enerji resursları ilə özü-özünü təmin edir, hətta ixrac edir. Neft və qaz üzrə ən böyük hasilatçıdır. Eyni zamanda, bu gərginlik dövründə düşünülür ki, Amerika iqtisadiyyatı daha güclüdür və bu səbəbdən investorlar Amerika dollarına qaçırlar. İkinci məqam isə, enerji resurslarının qalxması inflyasiyanı artıracaq gözləntisi, həmçinin Amerika dollarının faiz dərəcəsini Amerika Mərkəzi Bank tərəfindən artıracaq ehtimalı yarandı. İnflyasiyanın artması Amerika Mərkəzi Bankının faiz siyasətinə təsirsiz ötüşməyəcək və inflyasiyanın artması da pulu bahalaşdıracaq. Ona görə də dollar bahalaşdı. Qısamüddətli və ya ortamnüddətli dövrdə dollara hansısa risk gözlənilmir. Dollar yenə də əsas ticarət və yığım valyutası kimi qalacaq”.
