Atəşkəs danışıqları davam edərkən, İsrailin Rəfaha hücumları davam edir. ABŞ prezidenti Co Bayden İsrailin Rəfaha genişmiqyaslı hücumla girəcəyi təqdirdə ona silah göndərilməsini dayandıracağını bildirib.
Turkustan.az xəbər verir ki, ABŞ prezidenti Bayden CNN-ə verdiyi müsahibədə həm Qəzzadakı vəziyyəti, həm də İsrailin Rəfaha hərtərəfli qurudan hücum edəcəyi təqdirdə ABŞ-ın münasibətini qiymətləndirib.
Administrasiyasının keçən həftə İsrailə təxminən 900 kiloluq bomba göndərilməsini dayandırması ilə bağlı Bayden, "Bu bombalar və (İsrailin) mülki əhali mərkəzlərinə girməsinin digər yolları nəticəsində Qəzzada dinc sakinlər öldürüldü" dedi. O, şərh verərək, Qəzzada fələstinli mülki əhalinin öldürülməsi üçün Amerika istehsalı olan bombaların istifadə edildiyini etiraf edib.
Daha əvvəl də dəfələrlə İsraili Rəfaha qarşı hərtərəfli quru hücumuna qarşı xəbərdar etdiklərini xatırladan Bayden, İsrailin baş naziri Benyamin Netanyahu ilə son görüşündə bu məsələni açıq şəkildə dilə gətirdiyini qeyd edib.
ABŞ prezidenti Bayden, “Əgər onlar Rəfaha daxil olsalar, hələ (hərtərəfli hücumla) girməyiblər, girsələr, o zaman Rəfah və digər şəhərlərdə istifadə olunan silahları göndərməyəcəyimi açıqlamışam” deyib.
İsrailin təhlükəsizliyini təmin etməkdə hələ də qərarlı olduqlarını vurğulayan Bayden, İsrailin mülki yaşayış məntəqələrində istifadə etdiyi bəzi silah, bomba və artilleriya mərmilərinin göndərilməsini dayandıracaqlarını vurğulayıb.
Eltac Zülfüqaroğlu/Turkustan.az
