Karib dənizinin ən böyük təyyarədaşıyan gəmisi olan USS Gerald R. Fordun dünən bölgəyə gəlişi yenidən Venesuelaya diqqəti yönəldib.
Turkustan.az xəbər verir ki, Venesuela ABŞ-ın mümkün hücumuna hazırlaşdığı bir vaxtda, Vaşinqtonun “narkotik ticarəti ilə mübarizə” adı altında avqust ayından bəri Karib dənizi və Sakit okean regionuna dəniz və hava qüvvələri yerləşdirməsi davam edir.
ABŞ-ın bölgədəki hərbi varlığı artdıqca, Venesuela ordusu da mümkün hücum ssenariləri üçün yüksək hazırlıq vəziyyətinə gətirilib.
Vaşinqtonun Karib dənizi sularına USS Gerald R. Ford təyyarədaşıyan gəmisini göndərməsinə cavab olaraq, Venesuela müdafiə naziri Vladimir Padrino Lopez bildirib ki, prezident Nikolas Maduronun hökuməti “imperiya təhdidlərinə qarşı müdafiə məqsədilə ölkə daxilində 200 min əsgərin iştirakı ilə genişmiqyaslı hərbi səfərbərlik başlatdı.”
Nazir Lopezin sözlərinə görə, səfərbərlik əmri quru, hava, dəniz, çay və raket qoşunlarını, həmçinin Bolivar milislərini, mülki təhlükəsizlik orqanlarını və inteqrasiya olunmuş müdafiə komandanlıqlarını əhatə edir.
Aytən Yaşar/ Turkustan.az
