2-ci tip diabetin dərmanı olan metformin COVID-19-da virus yükünü azalda bilər.
Turkustan.az xəbər verir ki, bu barədə “MedicalXpress” məlumat yayıb.
Minnesota Universitetinin alimləri metformin, plasebo (aktiv tərkib hissəsi olmayan həblər) və ya ivermektin qəbul edən koronavirus xəstələrinin virus yükünü müqayisə ediblər. Sonuncu dərman parazitləri müalicə etmək üçün istifadə olunur. COVID-19 pandemiyası zamanı onun virusla mübarizədə effektivliyinə dair məlumatlar ortaya çıxıb.
Yeni araşdırma plasebo və ya ivermektin qəbul edənlərlə müqayisədə metformin qəbul edən xəstələrdə virus yükünün demək olar ki, dörd dəfə aşağı olduğunu müəyyən edib. Əvvəllər daha yüksək virus yükü koronavirus infeksiyasının daha ağır gedişi ilə əlaqələndirilirdi. Metformin alfa, delta və ya omikron variantları ilə yoluxmuş peyvənd edilib və peyvənd olunmamış xəstələrdə təsirli olub.
Nəticələr əvvəlki araşdırmada metforminin COVID-ə yoluxanlar arasında xəstəxanaya yerləşdirmə və ya uzun müddətli xəstəlik ehtimalını niyə azaltdığını üzə çıxarıb. Müəlliflər qeyd ediblər ki, araşdırma həkimləri COVID-i müalicə etmək üçün metformin təyin etməyə inandıran dönüş nöqtəsi ola bilər. /cebheinfo.az/
