“İslam Respublikası nüvə proqramını bərpa edərsə, İsrail İran ərazisinə yeni zərbələr endirməyə hazırlaşır”.
Bu barədə “Axios” portalı mənbələrə istinadən məlumat yayıb.
Məlumata görə, İsrail rəsmiləri ABŞ Prezidenti Donald Trampın bu cür hərəkətlərə razılıq verə biləcəyinə inanırlar. Belə ki, İsrailin strateji planlaşdırma naziri Ron Dermer bu yaxınlarda Vaşinqtona səfərindən sonra qapalı görüşlərdə Ağ Ev rəhbərinin müəyyən şəraitdə İrana zərbələr endirilməsini dəstəkləyəcəyini bildirib.
Portal onların arasında Tehranın Fordo, Natanz və İsfahandakı hücuma məruz qalmış nüvə obyektlərindən yüksək zənginləşdirilmiş uranı çıxarmaq cəhdini qeyd edib. Digər səbəb isə uranın zənginləşdirilməsi obyektlərində işlərin bərpası ola bilər.
Bu kimi açıqlamalar isə İrana yenidən zərbələrin endirilməsi ehtimalını gündəmə gətirir.
Görəsən, İran yenidən hücuma məruz qala bilərmi?
Mövzu ilə bağlı Bizim.Media-ya açıqlamasında politoloq Tofiq Abbasov bildirir ki, İrana İsrail tərəfindən yenidən zərbələr endirilə bilər, amma bu zərbələrin də iki başı olacaq:
“Əslində Netanyahunun son dövrlər ərzində üçüncü dəfə Vaşinqtona yollanması həm də ABŞ-ın tutarlı tərzdə İsrailə silah-sursat verməsini istəməsilə bağlıdır. Amerikanın özünün raket cəbhəxanası tükənib. İrandan buraxılan dronlar, pilotsuz aparatlar həmişə əks hücumu da tələb edir. Belədə Amerikanın bölgədəki gəmilərindən İran raketlərinə qarşı zərbələr endirilirdi.
Lakin bu o qədər də etibarlı müdafiə sistemi kimi özünü göstərə bilmədi. İsrailin haqqında çox danışdığı “dəmir gümbəz”i İranın raket hücumları qarşısında 40 faizə qədər acız qaldı. İsrailin 21 strateji obyekti, hərbi aerodromları, neft bazaları, 3 limanından ikisi, ordu qərargahı, MOSAD-ın baş qərargahı dağıdılıb. Onlar bərpa oluna bilməyəcək. Digər tərəfdən, İsrailin müdafiə potensialı da xeyli zəifləyib”.
Ekspertin fikrincə, Netanyahu hökuməti praqmatik düşünərək qərar qəbul etsə, İrana növbəti hücumdan geri çəkilməlidir:
“İsrail son iki ildəki hərbi əməliyyatla Hizbullahı, HƏMAS-ı vurdu. Habelə həmin qruplaşmaların yüksək çinli rəhbərlərini və İrandan olan bir sıra yüksək rütbəli generalları aradan götürdü. Bunlar hamısı İranı müharibəyə cəlb etmək üçün atılan addımlar idi. Nəhayət İsrail 7 oktyabr ssenarisini iyunun 13-də İrana qarşı istifadə etdi. Amma cavabını da aldı. Proses göstərdi ki, İsrail İranı çökdürə bilməyəcək. Bu fonda İsrail növbəti dəfə İranı vurmağa cəhd etsə, güman ki, olan-qalan bütün obyektləri də raket hücumu ilə məhv ediləcək. İsrailə isə bu lazım deyil”.
Politoloq deyir ki, Netanyahu yaratdığı situasiyanın girovuna çevrilib:
“Digər tərəfdən, Netanyahunun hökumətindəki ultrasağçılar ultimatum veriblər ki, nəyin bahasına olursa-olsun, İrana qarşı müharibə davam etdirilsin. Amma fikrimcə, onlar daha çox emosiyaya qapılıblar”.
