Pakistan ilə Əfqanıstan arasında münaqişənin genişlənməsi və regional təhlükəsizlik gündəminə təsiri fonunda Səudiyyə Ərəbistanı ilə Pakistan arasında imzalanmış mühüm müdafiə sazişi beynəlxalq diqqəti cəlb edir.
Turkustan.az xəbər verir ki, Səudiyyə Ərəbistanı və Pakistan 2025-ci ilin sentyabrında Strateji Qarşılıqlı Müdafiə Sazişi imzalayıb. Sazişə əsasən, tərəflərdən birinə qarşı hücum hər iki ölkəyə qarşı hücum kimi qiymətləndirilir və kollektiv təhlükəsizlik prinsipi tətbiq olunur. Bu müddəa iki ölkə arasında uzun illərə söykənən təhlükəsizlik əməkdaşlığını daha da rəsmiləşdirir.
Müdafiə sazişi mövcud hərbi və diplomatik əlaqələri gücləndirməklə yanaşı, regionda artan təhlükəsizlik riskləri fonunda birgə çəkindirmə strategiyasının möhkəmləndirilməsini hədəfləyir. Analitiklərin fikrincə, sazişin praktik tətbiqi regional hadisələrin inkişafı ilə müəyyənləşəcək.
Məlumatlara görə, Səudiyyə Ərəbistanı Pakistanın Əfqanıstanla davam edən qarşıdurması çərçivəsində, zərurət yaranarsa, hava qüvvələri də daxil olmaqla müəyyən hərbi elementlər göndərməyə hazırdır. Bununla belə, Əfqanıstanda hakimiyyətdə olan Talibanla münaqişənin daha da şiddətlənəcəyi halda Ər-Riyadın birbaşa hərbi müdaxilə edib-etməyəcəyi hələlik qeyri-müəyyəndir.
Aytən Yaşar/ Turkustan.az
